No que va d’añu namás se rexistró n’Asturies un conveniu de nueva creación, anováronse 17 y notificáronse incumplimientos de los convenios coleutivos tresañales d’otres 22 empreses
La negociación coleutiva ye fundamental para afaer unes condiciones llaborales y salariales medianamente dignes para les y los trabayadores. El númberu de convenios roblaos nestos meses y el de persones suxetes a ellos ta bien perbaxo de va un añu, según recueye un informe del sindicatu CCOO. Ente marzu y mayu les negociaciones sufrieron un lóxicu estancamientu debíu al confinamientu, pero la continuación de l’actividá llaboral nun lleva apareyao una meyora paralela nes negociaciones y anque nos últimos meses se retomaren dellos procesos de negociación, el rexistru de convenios coleutivos sigue ralentizáu respeutu d’años anteriores. No que va d’añu namás se rexistró y publicó 1 conveniu de nueva creación, y anováronse namai 17 convenios esistentes, llegando solo a unos 15.190 trabayadores. Otros 19 remataron la so vixencia en 2018 o 2019 y tán denunciaos pa promover la so negociación; pente los de mayor repercusión ta’l de ArcelorMittal.
Amás de les empreses qu’entá nun axustaron nuevu conveniu, 22 empreses recibieron quexes énte l’autoridá llaboral por nun aplicar los anteriores convenios tresañales, siendo probablemente’l de EBHI el casu más conocíu.
Los sindicatos recuerden tamién qu’el 2020 ye l’añu nel que tenía que llantase de forma xeneralizada los 14.000 euros de salariu añal en tolos convenios.
Llucía F. Marqués
This work is licensed under a Creative Commons Attribution 4.0 International License.
