Vox pidi que s’anule l’alderique sobro una moción que beneficiaría a la hostelería por tar redautada en castellán. L’alcalde, socialista, aceuta incumplir la llei y retira la moción. Non contentu con esto, iguala n’usu del asturianu en Asturies col usu del chinu ¿Asturfobia o inorancia? que caún saque les sos conclusiones

Yá va dos años que la FSA-PSOE dieron la campaná de camudar radicalmente la so histórica posición anti-asturianu, sofitando, siquier de palabra, la oficialidá. Dos años semaos de discretos guiños y brindes al aire de los que tán enllenos los periódicos, como la cabera intervención del presidentísimu Barbón, na que dedicó al asturianu los segundos de rigor. Paez ser que nestos dos años Ángel García “Cepi” nun tuvo tiempu de ponese al día -nin siquier viviendo en Sieru, onde lo difícil ye salir a la cai y siguir inmune al asturianu- y deprender l’idioma qu’el so partíu diz defender, y asina nun tuvo más remediu que retirar la moción sobro la normativa de terraces, escrita n’asturianu.

Digna d’allabar ye, eso si, la sinceridá del alcalde a la de reconocer la so suprema inorancia: pa él, l’asturianu ye tan incomprensible como’l chinu. Probe home, tien de tener series dificultaes pa rellacionase colos sos vecinos. Podemos imaxinar el so murniu desconciertu énte los cartelos de los “Güevos Pintos”, la so congoxa énte la celebración añal nel so propiu conceyu del certame de “Cancios de Chigre” o la so desubicación al tener que buscar “el prau del Carmín”. Tampoco debe de tar bien al día no qu’a llegalidá se refier, yá que la so decisión de nun almitir a alderique la moción presentada n’asturianu ye contraria a la Llei d’Usu y Promoción del Asturianu, del añu 1998.

Daqué asemeyao debe d’asocede-yos a los conceyales de VOX, que al paecer entiéndense la mar de bien con Cepi, pero nun entienden l’idioma del restu de los sos conciudadanos; anque de la ultraderecha española nun tendría d’estrañanos tantu…  ¿O ye que nun hai tanta diferencia?

Nuria Priende

Nuria Prendes

This work is licensed under a Creative Commons Attribution 4.0 International License.