La Real Academia de la Lengua Española recibe 6 millones más que la suma de les otres cuatro academies del Estáu. L’Asturiana vuelve recibir cero euros
Según el borraor de los nuevos Presupuestos Xenerales del Estáu, la Real Academia Galega va recibir 311.380 €, esautamente lo mesmo qu’el Institut d’Estudis Catalans; la so homóloga vasca, Euskaltzaindia, daqué menos: 220.000 €. L’Academia la Llingua Asturiana caltendrase’n cero euros de presupuestu públicu. Pente les cuatro sumen 842.769 €,cifra que la Real Academia de la Llingua Española multiplica por ocho pa consiguir llimpiar, afitar y dar rellumanza a una llingua que, a xulgar polos fondos que precisa, tien d’atopase nun estáu deplorable.
Pa nun perder el vezu, y a pesar d’atopase nel gobiernu los dos partíos españoles qu’afirmen ser los garantes de los drechos llingüísticos de los asturianos, el tamden PSOE-Podemos volvió dexar a Asturies en cero euros.
Estos presupuestos del reinu salen de los impuestos comunes de tolos ciudadanos, incluyíos los asturianos, polo que puede afirmase ensin medrana de equivocase que colos nuesos impuestos finánciense cuatro llingües ayenes mientres s’ignora la nuesa. Nun son solo les aportaciones a les respectives academies, la Oficialidá de les distintes llingües dexa’l cobru del llamáu coeficiente del billingüismu que perciben toles comunidaes con llingua propia menos la nuesa, más perres que pierde Asturies.
Cuando más cerca tuvo de recibir Asturies estes ayudes foi nel 2018, cuando Compromís, una formación ayena a Asturies, plantegó una enmienda por que se dedicaren 100.000 euros a la Alla, enmienda que fracasó gracies a los votos de TOLOS senadores asturianos del momentu. Los que prefirieron que Asturies perdiera dineru con tal de nun defender l’asturianu naquella ocasión fueron los darréu implicaos en casos de corrupción, Vicente Álvarez Areces y Maria Luisa Carcedo, del PSOE, la teóricamente asturianista Rosa María de Posada, por FORU y el senadores pol PP, Fernando Goñi, Mario Arias y Ovidio Sánchez.
Llucía F. Marqués
This work is licensed under a Creative Commons Attribution 4.0 International License.
