Les últimes midíes comunicaes pol gobiernu a los docentes inclúin la permanencia nos centros educativos el tiempu puramente necesariu para dar les clases presenciales, una revindicación que dexa a cientos de profesores analayando peles cais ente una hora llectiva y otra

La mayoría de los docentes, especialmente en secundaria, nun dan siguíes toles sos hores, si non que les clases presenciales alternense con xuntes de departamentu, claustros, tiempu pa preparar materies y otres funciones qu’agora van realizar telemáticamente n’horariu de tardes. Si la midida de llindar la estancia de el profesores nel centru s’aplicáre dende entamos de cursu, como demandaben los sindicatos, plantegaríense los horarios de manera que s’embrivieren los tiempos muertos. Como d’avezu, la midida llega tarde y da llugar a hores de furacos ermos ente clase y clase.

Un profesor va tener, por casu, clase los llunes de 8 a 8:45, una hora llibre, de nuevu clase de 9:30 a 10:15 y de 10:15 a 11:00 y de nuevu llibre hasta última hora, variando los horarios acaldía la selmana. Col protocolu recién enllantáu va tener que realizar dellos viaxes de día y revolvía, si tien la poco frecuente suerte de vivir al par del centru onde imparte materia o, na mayoría los casos, permanecer pela redolada del mesmu, pero non dientro.

El primer día con esti nuevu sistema el profesores recibieron con cierta incredulidá la noticia de que teníen que salir del centru nes sos hores llibres y realizar otres xeres n’horariu non lectivu, de tardes. Con cierta resignación salieron a dar un paséu, tomaron dellos cafés y volvieron al centru. A partir de güei la cosa complícase: nun va haber cafeteríes abiertes, asina que les opciones llindense abondo. Esperemos que nun llueva.

Llucía F. Marqués

This work is licensed under a Creative Commons Attribution 4.0 International License.