El de la hostelería ye ún de los seutores nel que la precarización y l’abusu llaboral ye más xeneralizáu ya incluso aceutáu comu “normal”. Una encuesta fecha va pocu pente más de cien trabayaores que participaron de manera anónima, apurre datos bien nidios: El conveniu cúmplese namás nel 25% de los casos ya’l 75% de los emplegaos entrugaos afirmen que nel so puestu nun se respeten les condiciones llaborales llegales. El 73% vense obligaos a facer funciones que nun correspuenden al so contratu. Tampocu los horarios se cumplen, el 76% trabaya perriba de lo apautao, con un 24% que suma más de 60 hores de trabayu selmanales, daqué que nun apaez nos rexistros de les empreses pol espardíu vezu de falsiar los rexistros horarios pa que queden recoyíes namás 40 hores selmanales. Más de la metá de los contratos, cuando esisten (el 12% reconoz trabayar en B) son de calter temporal. Pa enrriba, el 51% de los trabayaores carecieron menacies, acosu, insultos o coaciones nel so puestu de trabayu ya’l 11% vieron como-y pasaba a les sos compañeres.

L’impagu d’hores estres, la nocturnidá ya’l trabayu en festivos ta perespardio nel seutor y cuando los trabayaores se ponen en fuelga, los empresarios hosteleros nun duden de tirar d’esquiroles pa cubrir rapidamente la falta.

En resume, escasamente un cuartu de los empresarios hosteleros tienen a los sos emplegaos trabayando en condiciones dignes, siendo más acusada la esplotación nes fasteres más turístiques y nes grandes ciudaes.

Tou ello debuxa un panorama que fae comprensible la escasa repercusión que les actuales protestes de defensa del seutor tienen pente los sos propios trabayaores, a los que se yos fae pindio defender los drechos de quien ignora los suyos.