La asturfobia esplícita de la formación política d’estrema drecha lleva a VOX a esibir ostensiblemente los sos ideales colonialistes, nos que cualesquier ñiciu d’identidá non española tien de ser darréu aniquiláu
Va pocu más d’un añu Ignacio Blanco, diputáu de VOX por Asturies, solicitaba la illegalización de Andecha Ástur, faciendo una de les meyores definiciones d’esta formación nacionaliega “Refiérense a Asturies como una nación, defenden el drechu d’autodetermín del pueblu asturianu y refiérense al asturianu como la llingua nacional d’Asturies. Agora, siguiendo na mesma llínia y tal como anunció dempués fregáu llingüísticu nel plenu de la Xunta Xeneral que tuvo llugar mientres la Selmana les Lletres, Blanco presentó un recursu d’inconstitucionalidá contra’l cambéu de reglamentu d’esti organismu, que garantiza’l derechu a utilizar l’asturianu mientres les sesiones plenaries.
De la man del diputáu nel congresu Jose María Figareo van llevar el recursu d’inconstitucionalidá al Congresu, pa tratar de que seya inhabilitáu’l Reglamentu de la Xunta Xeneral pol que los miembros del Gobiernu y cualquier persona que interviniere na Cámara pudiera faelo n’asturianu. Pa ellos, la inconstitucionalidá anicia en que la posibilidá d’utilizar l’asturianu ensin represalies “Supón una oficialización de facto del bable y obliga a los asturianos a conocer el bable normalizáu”, ello ye, que ve como una menacia la obligación de salir de la so ignorancia.
Casu de considerar seriamente estes declaraciones, el Congresu Español podría solucionar esta “irregularidá” per dos víes: anulando’l Reglamentu o declarando una bones la Oficialidá y finar con estos alderiques.
Llucía F.Marqués
This work is licensed under a Creative Commons Attribution 4.0 International License.
