Interminables caravanes pa dir a los llagos, playes na que l’aparcamientu cuadriplica la sablera, pasos de monte asfaltaos “pa faer el tránsitu más cenciellu”… turismu mal enfocáu, mal xestionáu, mal aprovecháu

.  Llucía Fernández Marqués

Inda nun llegó’l branu y yá hai problemes p’aportar a dalgunos de los llugares más emblemáticos d’Asturies.

Tamos viviendo una problemática propia de la masificación turística ensin qu’eso revierta direutamente nun claru beneficiu económicu pa les zones afectaes nin nun especial curiáu de los espacios naturales y cultura propies, dos cuestiones que son precisamente l’atractivu col que quier promocionase esti turismu. A los asturianos quiso vendésenos que yera la solución económica a los nuesos problemes y a los visitantes viéndese-yos un paraísu idílicu que contrasta cola contaminación, les llaceries urbanístiques, les quemes y les matances d’animales.

El resultáu ye que, mientres la población asturiana avieya y emprobez (a los últimos datos, que nos asitien a lo cabero de la riqueza económica, me remito), el turismu va revelándose, como munchos yá prevíamos, una vía precaria ya insuficiente pa constituyir una manera de vida dignu pa la población, obligando a miles de mozos y moces a emigrar añalmente. Lo que se nos quiso vender como solución ta siendo, a la hora la verdá, parte’l problema.

This work is licensed under a Creative Commons Attribution 4.0 International License.