Ta furtiándose a la sociedá asturiana l’alderique sobro la xestión del andanciu del Covid-19: qué ta pasando, porque tamos como tamos, cual ye’l papel del “Principado”, que pinta Adrián Barbón…. A eses entrugues, y a dalguna más, retruca Llucía Fernández, en calidá de miembru de la Xunta Executiva, d’Andecha Astur, única organización política que fasta agora vien calteniendo un analís del andanciu dende una perspeutiva asturiana

La entruga que tol mundiu se fae ¿Cómu se pasa de ser una zona 100% llibre de Covid a les cifres nes que mos movemos agora mesmu?

El papel de Barbón nesti andanciu Covid19 ye patéticu, y en munchos sentíos criminal. Reconociendo la evidencia de que tendríe qu’aisllase Asturies del Estáu español pa evitar la entrada de vectores de tresmisión, non solo nun lo fai –“nun teo competencies”- sinón que vendió turísticamente Asturies como destín seguru, trayéndomos nos meses del branu una masificación turística precisamente de la población con mayor porcentaxe d’afeutaos pol andanciu. Esa ye la causa principal de la “segunda fola” n’Asturies, eso desplica por qué tamos asina.

N’Asturies lleva escalándose la Sanidá Pública dende hai años, na mesma dinámica de desindustrialización y esfarrapamientu del texíu socio-económicu asturianu. L’Estáu español colos sos cómplices del “Principado” vienen aplicando un  progresivu desmantelamientu de la Sanidá Pública Asturiana y dándo-y puxu a la so privatización, talo como vien denunciando Andecha Astur dende hai tiempu: presllen cientros de salú, nun renueven les places de profesionales sanitarios que se xubilen, nun formen abondos profesionales nesti campu, nin se facilita la so especialización, y lo que ye pior, oblígase-yos a emigrar al nun ufierta-yos una alternativa llaboral con un mínimu de garantíes salariales y d’estabilidá

Nesa situación, la nuesa sanidá pública yá se veía saturada en cuantes apaecíen los periódicos andancios gripales, colos pacientes apinaos pelos pasiellos… nin que dicir tien que nun esistía denguna posibilidá d’enfrentase con garantíes a esti andanciu.

Llevamos dende Mayu sabiendo qu’habría una segunda fola ¿tomáronse les midíes afayaices pa controlala?

La rialidá ye que dende qu’entamó el Covid19  el “Principado” nun tomó denguna midía de refuerzu de la Sanidá Pública Asturiana, por más que yera evidente la falta de recursos humanos y materiales na que s’afayaba, y yera persabío y anunciao que vendríe otra segunda fola, entá más pelligrosa.

Si agora tamos a les puertes d’un nuevu confinamientu nun ye una casualidá, ye la consecuencia d’unos políticos responsables del escalamientu de la Sanidá Pública, y que nun cumplieron coles sos obligaciones, esperando órdenes de Madrid y dedicándose a facer –como Adrian Barbón- una política de sermonéu, tuits y posturéu.

N’Asturies la rempuesta frente al Covid19, pasaba pol aisllamientu territorial del Estáu español na fase na qu’Asturies nun carecía l’andanciu, el reforciamientu urxente de la Sanidá Pública dotándola de los medios humanos y materiales precisos pa facer frente a la situación con un mínimu de garantíes, la proteición social a los seutores sociales más desfavorecíos, que son los principales perxudicaos socio-sanitariamente, y les ayudes a tolos afeutaos poles restricciones sanitaries.

Por más que falsien los datos lo cierto ye que nun hai suficientes cames, nin UCIS, nin profesionales sanitarios, nin medios p’atender eficazmente a los enfermos; que tan anulándose intervenciones d’otres patoloxíes que nun se consideren tan urxentes, desatendiéndose l’atención a los crónicos, baxando l’atención primaria a niveles tercermundistes. Per otru llau la desasistencia social dispárase, yá yera mala, pero agora ye pior, decenes de miles de families asturianes afáyense ensin recursos, nuna situación de probitú inxustificable, y pa enriba los seutores afeutaos poles restriciones sanitaries tampoco nun tan recibiendo un mínimu sofitu istitucional… precarízase la vida, de fechu ponse en xuegu la vida de los asturianos y asturianes.

Faláis de la necesidá de midíes de proteición social… ¿Por qué?

L’andanciu tien un sesgu social claru que nun pue tapecese. Nun hai más que ver les estadístiques pa ver que la mayor incidencia afáyase nos barrios obreros y los seutores sociales más desfavorecíos, por mor de les males condiciones socio-sanitaries nes que s’afayen. Por eso, la proteición social ye urxente, porque careciendo Asturies un nivel de probitú del  24’6%,  y de 13,6%  de probitú severo (la mayor tasa del estáu)  esti andanciu deteriora entá más les condiciones de vida de la xente, o cuésta-yos la vida direutamente.

La implementación de midies de proteición  ya’l refuerciu de los servicios sociales ye una cuestión urxente, o les consecuencies derivaes de la crisis económica van ser más graves entá que les derivaes de la enfermedá mesma.

Hai muncho que facer nesi camín y nun se dio nin un solu pasu: plantegar midies como una moratoria de suministros básicos nos domicilios, la paralización de desfiucies -como mínimu demientres l’estáu d’alarma-   solicitar l’anulación del pagu d’autónomos ya impuestos pa les PYMES afeutaes polos preslles, garantizar l’atención a domiciliu a les persones dependientes d’altu riesgu, meyorar l’atención en salú mental p’atender les consecuencies sicolóxiques de la cris, preparar la educación pa que la fienda teunolóxica nun vuelva a dexar atrás a la reciella más desfavorecío en casu de nuevu confinamientu… había muncho que podía facese na posa que mos dio’l branu, pero’l gobiernu del Principado prefirió cientrase n’atraer turismu –coles consecuencies que toos conocemos- y tuitear obviedaes.

¿La falta de soberanía asturiana incide de daqué manera na situación que mos afayamos?

Por supuestu, l’escalamientu de la Sanidá Pública Asturiana respuende a les polítiques del Estáu español p’Asturies; toviérenmos trés meses confinaos cuandu la incidencia del Covid19 n’Asturies yera mínima, impidiéronmos aisllamos del Estáu español pa evitar la entrada de vectores de tresmisión, y agora que fadríe falta, impídenmos confinamos.

Lo pior ye que’l propiu presidente del “Principado” ye’l primeru que reconoz públicamente estos fechos, pero fai como si nun tovieren ná que ver con elli, como si nun toviere responsabilidaes, y sigue a la muera de lo que-y manden dende Madrid, sumisu y obediente.

This work is licensed under a Creative Commons Attribution 4.0 International License.