Dende la Corriente Sindical d’Esquierda informen de la intención de la empresa d’esaniciar, col alcuerdu d’UXT, USU y ACIAA, el puestu de Visitador, cargando a los Maquinistes coles sos funciones, daqué que consideren una midida peligrosa ya ineficiente, tomada solo en función del mayor rendimientu económicu

La CSI fixo públicu la situación na que s’atopen el trabayadores del taller de Ferrocarriles o Tresportes Internos d’Arcelor Mittal, onde se ta intentando esaniciar un puestu esencial para la seguridá.   Les pretensiones empresariales pasen pola eliminación del puestu encargáu de revisar toles circulaciones Ferroviaries de la empresa, los Visitadores, que pasaríen de 13 a 2, y asignar les sos xeres a el Operadores de Tracción o Maquinistes, pasando estos a ser Operadores Mantenedores de Tracción. Esto implicaría la realización per parte de los Maquinistes, con solu de 40 hores de formación práctica a contra reló, d’unes xeres hasta agora realizaes por compañeru con una llarga trayectoria práctica y formativa para’l desempeñu del so trabayu.

El puestu de visitador qu’agora la empresa ve innecesariu, foi internalizado hai 11 años por considerase “esencial” p’ asegurar la seguridá, n’ocasiones comprometida pola complexidá y l’abandonu en cuanto al caltenimientu y antigüedá del material móvil (vagones, plataformes… etc.). Pa evitar accidentes, n’ocasiones mortales, agora ta afitao que la revisión de les composiciones ferroviaries se faigan de forma conxunta per parte del Maquinista, que se cerciona que’l tren frene correchamente, y del Visitador, que revisa toles partes mecániques, neumátiques… etc. que de nun tar en correctu estáu pueden causar u problemes como descarriles, perdes de frenáu, partise’l tren… Funciones de revisión y arreglu qu’agora pretenden que realice una sola persona ensin nengún tipu de supervisión y ensin el material necesario, yá que nun podríen llevalo, como faen los visitadores, n’una furgoneta, al tener que tar ellos mesmos conduciendo la llocomotora.
Hai que recordar que les circulaciones ferroviaries suelen rondar les 1000 tonelaes y que tantu nel trayeutu que comunica les factoríes d’Avilés y Veriña, ya inclusive dientro de les mesmes, hai cuestes pindies y desniveles asgaya, polo que cualquier incidente puede desencadenar un problema grave.

Redaición InfoAsturies

This work is licensed under a Creative Commons Attribution 4.0 International License.