Asturies fierve’n protestes. Piqueñes, seutoriales, tranquiles la mayoría, guardando distancies de seguridá toes. La intervención d’Adrián Barbón ayeri en rueda de prensa nun mentó a denguna d’elles nin anunció dengún cambéu qu’ameyore estes situaciones
El seutor cultural asturianu manifestóse ayeri, martes 16, na Llaboral, pa reclamar la reapertura inmediata de los espacios escénicos. Siguen ensin entender porqué se torga’l trabayar a una estaya que nun tuvo dengún biltu, pero que foi duramente castigada poles restriciones, inclusive nos momentos de mayor relaxación que se vivieron esti branu.
Les trabayadores del SAD de Xixón manifestáronse, tamién ayeri, pola remunicipalización y pa reclamar al Conceyu’l cumplimientu de los pautos. Trátase d’un de los seutores más afeutaos y que más precisen estremar precuros mientres la pandemia, yá que trabayen con persones de bien altu riesgu, pero entá asina tán albentestate, desprotexíes por una alministración que se desabre d’elles, perpetuando mientres esta crisis un tratu discriminatoriu que se remonta a va más de cuatro años.
Los hosteleros protagonizaron decenes de concentraciones per toa Asturies dende l’anunciu del zarru de los sos negocios. Munches d’elles son convocaes por HCC, Hostelería Con Conciencia, l’asociación que non solo defende los drechos de los hosteleros sinón que desixe’l cumplimientu per parte d’estos de la llegalidá llaboral para colos sos emplegaos nun seutor nel que la precariedá ye norma.
Na Cuenca’l Nalón les protestes de los piqueños comerciantes afeutaos polos préslles súmense a la de los hosteleros, nun encierru indefiníu na ilesia de La Felguera.
Ca miércoles dende hai más d’un mes, los trabayaores sanitarios de Cagüeñes arrinquen unos minutos a la so apretadísima xornada llaboral pa denunciar la descomanada presión asistencial que tán careciendo, nun intentu yá cuasi desesperáu de llamar l’atención énte la falta de previsión y reaición de les alministraciones y contra la toma de midíes desafortunaes -como l’asignación, pa les UCIs, de personal ensin la formación afayaiza- .
Ganaeros y pescaores entá nun protagonizaron denguna protesta organizada, pero yá anuncien posibles actuaciones pa reclamar midíes d’aida pola crisis xenerada pol covid-19. El zarru de la hostelería y la perda xeneralizada de poder alquisitivu llevó a una cayida de los precios de los sos productos cercana, en dellos casos, al 50%.
En resume, Asturies fierve’n descontentu y los distintos seutores organícense -xebradamente- pa reclamar salíes a situaciones, toes elles, difícilmente caltenibles si nun se tomen midíes darréu. Frente a elles, el “Principado” anuncia midíes económiques risibles (pagos únicos qu’en munchos casos nun cubrir siquier los gastos obligatorios d’un mes ensin ingresos) y, siguiendo na so llínea d’obediencia y culpabilización de la sociedá pide “contundencia na aplicación de les normes” a policías y guardia civiles.
Llucía F. Marqués
This work is licensed under a Creative Commons Attribution 4.0 International License.
