La empresa maerera responsable de los arramaos na reserva natural de la Ría de Villaviciosa recibió de la Confederación Hidrográfica del Cantábricu una sanción de namás 600  euros, amenorgaos a 360 por pagu voluntariu

La empresa almitió ser la responsable de la contaminación por turbidez que careció la Ría de Villaviciosa’l pasáu añu nos meses d’abril, mayu y xunu, emporcando les agües del ríu Profundu en Villaviciosa con una turbidez qu’algamó a apreciase fasta El Puntal.

Esta suciedá provenía de la saca de madera d’ocalitu y de movimientos  de maera frente’l barriu de la Piñera, na parroquia de Coru, realizaos ensin autorización nin midíes preventives pa torgar l’ estropiciu de la calidá de les agües del calce.

La maquinaria pesada de la maerera pasó perriba del calce’l ríu ensin tener permisu de vadeo demientres delles selmanes, prevocando, amás de los  daños evidentes al reu, el frayatu de la tubería de suministru d’agua potable de Villaviciosa, que tien la captación nes fontes del ríu Profundu.

La saca de madera entardó más d’un mes en ser paralizada desque los vecinos denunciaren les illegalidaes, siendo necesario que los medios de comunicación se fixeren ecu del impactu que suponía esti movimientu de tierres pa que se tomaren midíes.

La turbidez pudo apreciase na Reserva Natural Parcial de la Ría de Villaviciosa, un de los meyores estuarios Cantábricos. Tamos falando d’un espaciu natural que ye reserva de la Biosfera y que sigue teniendo les agües contaminaes, tando inclusive la ría de Villaviciosa presllada al marisquéu dende’l 2011 por contaminación fecal de les sos agües.

Esta triba de contaminación por turbidez y la sedimentación de les sos borrafes estropia seriamente la flora, la fauna y la microfauna de los acuíferos afeutaos, polo qu’a Coordinadora Ecoloxista d’Asturies vien denunciando estos fechos va tiempu y reclamando que les saques de maeres n’Asturies eviten el pasu de ríos y regueros, tomándose midíes nes temporaes d’agua pa evitar daños nes redolaes onde se desendolca’l llabor maereru.

This work is licensed under a Creative Commons Attribution 4.0 International License.