Quién diba dicir que por fin la Oficialidá del asturianu llegaría a ser la llave pa roblar -o non- unos presupuestos… pena que se use esi mediu cuando ye pa prohibila, y non cuando pudo ser pa desixila. Polo menos agora queda claro: los drechos llingüísticos de los asturianos tan a la vienta del meyor postor

Nel 2017 la llave de la negociación tuvo en manes de Podemos; pero pa ellos la Oficialidá nun foi prioritaria y robláronse los presupuestos del 2018 ensin que llegara nin siquier a tratase la tema. Tampoco apaeció la Oficialidá nos pautos para sacar alantre los socesivos presupuestos, a pesar de que se plantegaron otres desixencies pa que fueren aceutaos. Por fin nel 2020 la oficialidá del asturianu apaez como condición indispensable pa la negociación… pero non la so aprebación, sinón tolo contrario. Ciudadanos consiguió del “Gobiernu más favoratible a la oficialidá de la hestoria”, como munchos lu llamaron mientres les elleiciones, el compromisu de nun tratar siquier la tema mientres tol añu entrante.

Verdá ye que la reciente sinceridá del Gobiernu de Barbón ye, por una vegada, ponderatible, tanto como la fidelidá de Cs a los sos principios. Pal partíu naranxa la tema llingüística foi tan importante como para convertilo nun Sine qua non, daqué qu’enxamás fixeron quienes dicen tar a favor del asturianu (lleamos equí Podemos y l’acabante estrenar PSOE-pro-asturianu). Una podría ser mal pensada ya interpretar tol asuntu como una rapiega maniobra de la FSA-PSOE pa quitar d’en mediu a los oficialistes depués de décades de valeros intentos d’acabar con ellos  -incluyendo, como apocayá supimos, estorsiones direutes a medios de comunicación de calter estatal-.

Imaxínense que, en llugar de lluchar contra una causa, asonsañes xuntate máxicamente a ella, contradiciendo tolo que fixisti o dixeres fasta entós; los siguidores d’esa causa créente y vótente en masa, anuncies que “nun ta na to man” -como tantes coses que nun lo tán, salvanos d’una pandemia presllando a tiempu fronteres, por casu- y a partir de ahi llances un carambelín esporádicu, en forma de minutu de discursu o pallabrina al altu la lleva, p’amansar a les fieres. Toi solo maxinando, cualquier semeyanza cola realidá ye pura coincidencia. Toos sabemos que no fondero, allá bien no fondero, Barbón ye favoratible a la Oficialidá y nunca la vendería por un quítame d’ende esi vetu, llucharía por ella y nun arrenunciaría a cualquier oportunidá de dar pasos na so dirección…

Ah… espera… ¿Qu’acaba de prometer que’l próximu añu nun se va falar siquier de la tema? ¿Qu’arrenuncia a ello pública y esplicitamente, a pidimientu de Ciudadanos? ¿Pa qué? ¿para consiguir que Ciudadanos firme los presupuestos? entós… ¿Eso podía faese? ¿Podía utilizase la negociación, cuando’l votu ye decisivu, pa consiguir un compromisu llingüísticu? vaya… ¿Quién lo pensara?. Los partíos españoles que teóricamente defenden l’asturianu non, d’eso toi cierta.

Oxalá Asturies tuviera nel so gobiernu defensores tan encerriscaos como detractores tien, sedría otru canciu pal mesmu andanciu.

Llucía F. Marqués

This work is licensed under a Creative Commons Attribution 4.0 International License.