Tres cinco años llargos lluchando pola remunicipalización del Serviciu d’Ayuda a Domiciliu, con continues movilizaciones per parte de el trabayaores afeutaes, el Conceyu Xixón volvió aprebar esti añu, colos votos a favor PSOE ya IX que formen el Gobiernu municipal ya ensin cuntar pa na coles emplegaes, unos nuevos pliegos de condiciones pa sacar nuevamente a concursu’l serviciu, esto ye, caltenelu privatizáu. Les implicaes piden a la ciudadanía que les sofiten con cartes al conceyu o roblando telemáticamente unu resolvimientu de protesta
Güei, 25 payares, día marcáu nel calendariu como de llucha contra la violencia exercía sobro muyeres, ye bon momentu pa recordar que la precarización llaboral tamién ye una forma de violencia. Mientres 30 años, y con mayor implicación esti postreru, les trabayaores del SAD, un 98% muyeres, curiaron a una población vulnerable, siendo esti llabor el camín que munches atoparon pa salise del ámbetu de los cuidos familiares, buscando una salida llaboral que-yos permite llograr los sos propios ingresos. Sicasí, dase nel so sector una duple discriminación: escontra elles, por ser muyeres y por tantu precarizables y escontra les persones dependientes.
Muyeres y dependientes, dos coleutivos davezu fechos de menos por una sociedá que, entá güei, asume que nun van ser capaces de defendese de los abusos. Les cuidadores del SAD demostraron qu’esti nun ye’l so casu y desendolquen una llucha exemplar en defensa de la remunicipalización del serviciu, “la única manera d’ameyorar la calidá del mesmu y atayar la sangrante precariedá y el maltratu que carecemos per parte de les empreses privaes que faen de los nuesos derechos un gran negociu”.
Nesti casu xúnese a ello la corrupción reinal d’esti país: el propietariu de la empresa Aralia, a quien el Conceyu contrató pa esti llabor, ye Jose Luis Ulibarri, imputáu na trama Gürtel, Enredadera y Púnica, amás de tar al cargu de 16.000 vieyos nes residencies xeriátriques con mayor númberu de denuncies por suciedá, desatención, falta de personal y mala xestión del andanciu, al nun comunicar les incidencies col COVID.
Les emplegaes esperaben que’l fin del contratu con Aralia – denunciada por incumplimientu sistemáticu del conveniu, retrasos nos pagos a les trabayadores, falta de material de proteición sanitariu frente al COVID y los consiguientes contaxos ente trabayaores y usuarios- llevara direutamente a la naguada remunicipalización. Llueñe d’ello, el Conceyu publicó los pliegos coles condiciones pa la nueva contratación, con condiciones entá peores que los anteriores.
La división de la ciudá en trés llotes arbitrarios, acomuñando barrios alloñaos ente sí, va obligar a les trabayaores a realizar llargos desplazamientos ente un serviciu y otru y va dexar que seyan hasta tres les empreses axudicataries, estazando lo qu’hasta agora yera una plantiya compacta y xunida. Pa elles, lo que se pretende con esta división ye enfeblecer la so capacidá organizativa y de defensa. Amás esaníciense meyores consiguíes, como’l descansu de 30 minutos en xornaes de 6 o más hores, suprímese la obligatoriedá de pagu de los pluses esistentes por poner el coche a disposición de la empresa, los de fin de selmana o la paga calidable semestral. Nun se recueyen tampoco nos pliegos les demandes de reconocencia de les enfermedaes profesionales específiques, la reconocencia de les cases como llugar de trabayu cola consiguiente evaluación de prevención de riesgos llaborales nin l’amenorgamientu de la edá de xubilación.
Pa les trabayaores, ye inadmitible qu’un conceyu que se diz d’esquierdes, al frente del cual ta una muyer, la supuestamente feminista y socialista Ana González, caltenga, la esplotación llaboral y el maltratu istitucional sobro les trabayadores del SAD y sobro los beneficiarios del serviciu. “Un conceyu d’esquierdes faciendo polítiques de dreches, eso ye lo que significa caltener privatizáu’l SAD, convertir el feminismu nuna pose de cara a la galería qu’entra en total contradicción colos fechos”, denuncien.
Por too ello, soliciten a los ciudadanos qu’unvien una carta a l’atención d’Ana González, alcaldesa de Xixón , a la Conceyala Delegada de Facienda, organización municipal y personal de la Casa Conceyu Xixón y a la Conceyalía de Bientar Social, asina comu a los partíos nel gobiernu, reclamando los drechos d’estes trabayaores, daqué que pueden faer telemáticamente nel siguiente enllaz:
Retirá de los pliegos privatizaores y precarizaores del Serviciu d’Ayuda a Domiciliu de Xixón y remunicipalización darréu.
This work is licensed under a Creative Commons Attribution 4.0 International License.
