Onda Cero Centro Oriente emitirá en primicia esti cantar navidiegu col que Maxi Areñes ya’l so equipu quieren tresmitir un mensaxe de solidaridá y esperanza ante les situaciones difíciles

Un rapacín que ñaz nuna familia ensin medios nuna nueche fría, la xente del pueblu qu’acude a la llamada y comparte cola familia lo que tien, el recibimientu gociosu y solidariu a una nuea vida… una hestoria que se repite a lo llargo los sieglos y que lo mesmo podría ser la del Xesús bíblicu que la del okupa que ñaz pente miseria na nuesa ciudá o la del abellugáu qu’aporta pela mar. El villancicu nun podría ser, nin en música nin en lletra, más tradicional y al tiempu, más actual. “Queríemos facer daqué qu’apurriere un rayín d’esperanza, siguiendo la tradición de los villancicos, que anque foron remanaos pola relixón en munchos casos, nun son sinon los cancios del pueblu nel iviernu. Pero tamién queríemos dar con elli un mensaxe de calter social, de solidaridá perriba ideoloxies nun momentu no que importa nun son los collores nin les opiniones de caún: ñaz un neñin, hai que lu ayudar” declara Maxi.

Con una melodía na que ya trabayaben dende’l 2019, grabáu dende’l so estudiu allugáu’n Piloña y con collaboraciones aportaes dende Durango, esti villancicu ye un trabayu intermediu pente’l nueu discu, nel que ya tan trabayando y “El Máxicu viaxe de Fiona de Morlay”, presentáu n’Ochobre. La so presentación nel programa de Kike Carbayeira, n’Onda Centro Oriente, nun ye casual: dende’l mes de marzu, col envís d’animar el confinamientu, Maxi, vocalista y compositor del grupu, cuenta diariamente un de los sos “cuentiquinos” nesti programa y aína podremos esfrutar de toos ellos nun llibru que los recueye y nel que ta trabayando, cola ayuda de Maitetxu Islla nes illustraciones, que tamién ye la encargada del diseñu de la illustración de Nueche d’Avientu.

Fontoria fórmenla Pablo Pumarada, Xose Ramón Navia, Maxi Areñes y Nagore Goikolea, que poles peculiares circustancies d’esta dómina graba la so participación dende Durango. Toos ellos aprofiten la ocasión pa deseyar que l’añu entre con bon pie y que la fuercia de la solidaridá faiga más fácil el pasu de los momentos complicaos.

Fontoria Nueche d’Avientu – YouTube

Llucía F. Marqués

This work is licensed under a Creative Commons Attribution 4.0 International License.