Dende’l mio puntu de vista, roundamente sí. Al mio pensar trátase d’una necesidá imperiosa, y el fechu de nun faelo constituyi una seria amenaza pal futuru’l país.
Sé perfechamente que munches persones tán en contra. Yo voi esplicar los motivos polos que lo considero tan fundamental.
Fernando Nicolás Velasco
1. Evitar los llocalismos. Esta ye la mayor lacra a la qu’enfrentamos los asturianos. Conceyos tirando pa lo suyo y tratando de perxudicar, nos casos más drásticos, a otros. Rompiendo Asturies dende dientro.
2. Sinerxies. Nos aspeutos sociales, dos y dos nun son cuatro. Son cinco o seis. Evitaríense munches duplicidades y xuniríense esfuerzos. Habría coles mesmes más posibilidaes de retener el talentu.
3. Tener pesu específicu. Sería una de les mayores ciudaes del estáu y del sur d’Europa. Esto otorgaría nueves posibilidaes.
4. Ser un centru d’atración. Podría atrayese talentu esternu. Podrien captase inversiones qu’ayudaren a Asturies a poner en marcha los sos propios proyeutos. La universidá cuntaría con más investigadores p’aumentar la meyora teunolóxica, que tien de ser la base del sector económicu asturianu.
5. Ser una ciudá con nome propiu n’Europa y el mundu. El simple fechu de ser puestu nel mapa internacional fadría aumentar l’autoestima de los asturianos y de la so valoración del país.
Pero, ta nidio, tou esto nun significa de denguna manera “l’abandonu del mundu rural” en pro del xorrecimientu más o menos desafranada de la ciudá. Asturies presenta unes peculiaridaes orográfiques qu’enzanquen en gran midida l’averamientu de los pueblos más remotos. Sicasí, esisten maneres de desaniciar estos problemes. Pueden diseñase polítiques económiques que fomenten el bienestar de los asturianos y les asturianes que viven nestos llugares, ameyorando les víes de comunicación y sofitando l’establecimientu de pequenes empreses d’alta tecnoloxía. O otres qu’aprovechen los recursos naturales garantizando dafechu la sostenibilidá y recuperación d’eses redolaes.
Esta “gran ciudá” nun tien d’exercer de denguna manera una centralidad fagocitadora, como reparamos qu’asocede anguaño con otres grandes urbes. Nin necesariamente tien de tar nella la capitalidad alministrativa del país. Tien De ser el catalizador qu’impulse reacciones de prosperidá pal conxuntu d’Asturies. Obviamente, a tolos niveles d’organización social, hai que dicir claramente NON! Al centralismu.
Pero pa llevar a cabu esti proyeutu, ye primordial volver al puntu 1 de les mios considerancies. Asturies tien la obligación moral de desterrar los llocalismos. Nós, el conxuntu de la ciudadanía asturiana, tien d’actuar como un solu músculu. Tien de pensar n’Asturies y escaecer esa visión simplaya centrada na so llocalidá. Les lluches intestines, ermes ente hermanos, solo conducen a la autodestrución.
Si queremos crecer, ocupar el nuesu merecíu llugar nel mundu, ameyorar les nueses condiciones de vida p’asina poder ayudar a los más desfavorecios, y nun eslleir la nuesa esencia y la nuesa identidá na d’otros, tenemos d’esforcianos por ser nós mesmos. Y esti esfuerzu nun ye de baldre, nin podemos pretender, los ciudadanos y ciudadanes, que naide nos lo regale. Los políticos centrales nun lu faen, nin entra nos sos planes faelo nel futuru. Tenemos qu’ayudar a los nuesos políticos a consiguilo. A aquellos de los nuesos políticos que creen en Asturies. Y creánme, por desgracia, anguañu hai munchos polítcos y polítiques nel nuesu país que nun creen en, nin quieren a, Asturies.
This work is licensed under a Creative Commons Attribution 4.0 International License.
