L’actu d’homenaxe foi interrumpíu por una vecina de Deva que definió al poeta espontáneamente con una sola pallabra: collaciu

Va 36 años de la muerte d’Andrés Solar Santurio, reconocíu escritor que foi quien a dexanos na so curtia vida dalgunos de los meyores y más fondos versos de la lliteratura asturiana. Ca añu Andecha Astur entama un homenaxe a la so figura, nel que la xente que lu conociera y compartía con elli enfotos y pruyimientos lu remembren, poniendo l’acentu na persona y nel fuerte compromisu políticu d’Andrés, faceta interesadamente escaecida anguañu por munchos de los qu’allaben la so obra.

Na so intervención, Marcos A. entrugábase como pue escaecese esti compromisu na biografía d’una persona que dedicó una parte importante de la so vida a lluchar por Asturies, “Andrés yera muncho más qu’un escritor, yera un asturianu convencíu. Tamos falando d’una persona que sintetizó en cuatro versos tolo que ye la propuesta política d’un nacionalismu d’izquierdes: Prúyemos un pueblu llibre, que nome cola so voz los sos collacios ya’l pan, prúyemos un pueblu llibre y una Asturies Dixebrá”. Pero ya en vida, recalcó, Andrés Solar topare col pilancu de quienes quisieron echar abaxo la so militancia política, incómodos pola so coherencia y la claridá de la so visión nacionaliega “Lo que siempres intentó yera desplicar a los sos collacios, a la xente que vivía con él, a tolos que tenía alredor, que la única forma lóxica de vivir n’Asturies ye siendo asturianu, yera lo único intelixente, porque, si nun apostamos nosotros polo de nos, quién lo va facer? Ye la única opción que tenemos comu asturianos”.

Darréu la intervención, colocóse un ramu flores na placa que remembra l’autor a la puerte’l Cimenteriu de Deva dende va 16 años y finóse l’actu con una llectura de los sos poemes al pie la so tumba.

Llucía F. Marqués

This work is licensed under a Creative Commons Attribution 4.0 International License.