Ayeri tuvo llugar la emotiva Ufierta Floral añal, trece roses encarnaes pa les trece víctimes del franquismu asesinaes pola Bandera de Lugo en Tiraña va cuasi ochenta años

El 21 d’abril de 1938 San Pedro Tiraña foi escenariu d’un de los munchos crímenes franquistes carecíos n’Asturies, especialmente llamentable porque foi posible gracies a la collaboración de dalgunos de los mesmos vecinos del pueblu, caciques que facilitaron la llabor a un exercitu enemigu y foriatu, la triestimente conocía Bandera de Lugo.

Nel Cotu  los Álvarez de les Asturies, un día como ayeri, va 79 años, a les cuatro la tardi foron asesinaes trece persones. La fuesa a la que foron llanzaes, nel cementeriu Tiraña, foi testigu del respetu de los de so dende’l primer díe: pesi a la prohición esplícita d’atendela y llimpiala que recayó sobre ella nos años del franquismu, enxamás faltó quien s’arriesgare a llevar flores a escondíes.

Ayeri familiares, vecinos y compañeros de les víctimes tornaron a llevar flores, como se fae cada añu nestes mesmes feches, a la fuesa del cementeriu Tiraña, yá bien curiada y colos nomes d’aquellos que nun s’escaecerán.

Llucía Fernández Marqués

This work is licensed under a Creative Commons Attribution 4.0 International License.