Una concentración na Plaza Mayor de Xixón recoyía ayeri la protesta de la Plataforma, qu’anima a los ciudadanos a presentar una denuncia ante’l “Principado”

La Plataforma contra la Contaminacón desixe’l cumplimientu estrictu de la normativa vixente, ensin más retrasos y anteponiendo la salú ya’l bientar de las persones a los intereses económicos particulares d’una multinacional. Acusen a ArcelorMittal de utilizar el chantaxe nes negociaciones coles sos menacies de preslle, nes qu’alleguen “problemes económicos derivaos de la situación sanitaria”, al mesmu tiempu qu’aducen l’incrementu de la demanda d’aceru pa desixir la reapertura’l sinter A ensin cumplir cola Autorización Ambiental Integrá vixente (BOPA 16/01/2019).

La Plataforma denuncia qu’esta midía tómase ensin convocar siquiera al  Conseyu de Relaciones cola Comunidá, organismo qu’ellos mesmos crearon, despreciando a los trabayaores y los órganos de participación al nun convocar tampoco la Comisión de Mediu Ambiente, dexando’n papel moyao l’único y escasu artículu del so conveniu coleutivu  dedicáu a esta materia y les misiones principales d’esta comisión: recibir información na materia; proponer aiciones conducentes a la consecución de los oxetivos definios nesti artículu y facer un siguimiento de les midies propuestes.

L’apioramientu la calidá l’aire de la ciudá nel 2020 y a pesar del confinamientu y la redución de l’actividá llevó a les autoridaes a anunciar un plan de aire pa la Zona Oeste, la más perxudicá pola polución, pero ta entá en tramitación.Nesa zona superárense en cuasi cien ocasiones el valor llímite diario asina comu’l  Valor Mediu Añal afitaos na normativa pa les PM10, incumpliendo la norma un añu más. La contaminación causa el duple de muertes n’Asturies que n’España, siendo la causante de cuasi’l 7% de los fallecimientos. Nes actuales y esceicionales circunstancies sanitaries, los problemes respiratorios derivaos de l’alta contaminación coloquen a la población xixonesa nuna situación d’alta vulnerabilidá ante’l virus Covid-19, alzando enforma’l nivel de riesgu de carecer consecuencies graves.

Poro, conviden a presentar esti modelu d’escritu de denuncia y solicitú d’información ante’l Principado d’Asturies comu alministración responsable, ya seya presencialmente o en llínia, a traviés del rexistru lletrónicu xeneral de l’AGE  o a traviés del rexistru lletrónicu del Ayuntamientu  Xixón.

Redaición InfoAsturies