Ocupa les redes, con sofitu de la prensa, l’alderique cuasi continúu sobre la llexitimidá d’obligar a vacunase a quien nun quier versus l’egoismu asesín d’aquellos que tienen cierta prevención a la de poner una vacuna de la que malpenes esisten estudios. Con ello tenemos, gracies al enfotu polarizador de la prensa oficial y de les acertaes pallabres del insigne presidente, una nueva batalla pente bonos y malos cola qu’entretener a la población con deu acusaor, l’escenariu ideal pa despistar de la llamentable xestión de la sanidá asturiana. Unos cenciellos cálculos van amosar lo valero d’esti enfrentamientu, ya que’l problema tien perpocu que ver col querer o nun querer vacunase

Cuntábame un mélicu, bon collaciu, qu’esto ye comu tener diez mil persones morriendo de sede y una botella de llíquidu, que lo mesmo podría ser sidre qu’agua. L’alderique nun ta en si esi llíquidu ye bonu o non pa la deshidratación, nin si los afeutaos quieren o non bebela. El problema ye que nun hai abondo. Fecha esta introdución, paso a echar cuentes.

Asturies tien 1.019.993 moraores. La vacuna Pfizer necesita una doble dosis, colo que tamos falando de 2.039.986 vacunaciones. Repartíes en tol añu, considerando que nun s’apare dengún festivu nin fines de selmana, sedría preciso 5.589 vacunaciones al día.

El procedimientu de vacunación nun ye cenciellu: primero por que ca dosis vien perfechamente endolcada y una vegada abiertu’l recipiente, la prescripción mélica indica diez movimientos del frascu, disolver el conteníu pa obtener de ca recipiente cinco dosis, otros diez movimientos, estración de la cantidá esauta pa una dosis y finalmente si, la vacuna. O non, porque cuasi escaezo qu’anantes de vacunar ye obligatorio lleer a ca paciente la información completa de la mesma, posibles complicaciones y efeutos secundarios, pasando darréu a resolver dubies y roblar consentimientos, un procesu que ta durando una media de diez menutos.

En resume, siendo mui optimistes, tenemos una vacuna ca venti menutos por ca equipu, 24 en total pa una xornada llaboral. Sedríen precisos 233 equipos de vacunación con dedicación esclusiva y másima eficiencia les ocho hores demientres 365 díes. Ca equipu costa d’un mínimu de tres persones, colo que se precisa un continxente de 700 sanitarios contrataos ex-profeso pa conseguir finar les vacunaciones nun añu.

El fechu ye que nun se contrató nin una sola persona pa desendolcar esta xera, sinón que,  treslladando’l millagru de los panes y los pexes a la multiplicación del esfuerciu llaboral, la vacuna tan poniéndola los mesmos sanitarios que ya nun daben a bastu anantes de la crisis sanitaria y que se declararon saturaos anantes d’entamar la campaña de vacunación. Los mesmos que tendrán que dexar de facer el so trabayu avezáu o retrasar muncho, muncho, el ritmu de vacunaciones.

Pero tranquilos, porque tampocu por esto hai qu’esmolecese, porque comu tan arguyosu cacarexa Barbón, en namás una selmana tan ya consumies l’ochenta por cientu de les vacunes que se mos apurrieren por agora, un total de 9.707 persones en total que recibieron la so primer dosis-tornando a los cálculos aniciales, menos de lo que fadría falta vacunar en dos díes pa finar nun añu-. Asina que tranquilos, nun hai falta esmolecese porque la xente nun quiera vacunase, nin porque nun haiga personal nin medios pa vacunar, porque lo que nun hai son vacunes abondes.

Llucía F. M

This work is licensed under a Creative Commons Attribution 4.0 International License.