Nin siquier la campaña Nadaliega consiguió salvar un añu Laceriosu pa les cifres d’emplegu nel país y l’emerxencia social entama a esmolecer tantu o más que la sanitaria
82.070 persones privaes d’emplegu iscrites nes Oficines del Serviciu Públicu d’Emplegu, 12.113 más que va un añu y 556 más que’l mes anterior, yá desastrosu, ye’l saldu que refundia l’informe del SEPEPA del caberu mes. Si sumamos les 18.937 persones n’ERTE y les 12.585 autónomes cola prestación reconocía a les 82.070 iscrites nel paru, atopamos n’Asturies 113.592 persones ensin trabayu.
El paru cute con fuerza a tolos seutores y a tolos grupos de población, pero la mocedá ye la más perxudicá por esti fundimientu (con un 43,1% menos de contrataciones), qu’afeutó en mayor midía al seutor servicios (al baxar el 37,5%) y a la contratación temporal (con una cayida del 35,8%).
Coles mesmes, la precariedá llaboral sigue xorreciendo y el númberu de llares ensin ingresos medra, mientres s’encarecen los productos básicos. Les ayudes, amás d’insuficientes, lleguen tarde, siendo ca vegá más avezao frecuente alcontrar nes redes sociales llamaes de socorru de families que s’atopen a la llende, pidiendo ayuda para comer, ropa, o a cencielles una estufa, dexando n’evidencia la ineficacia del sistema de proteición social y la saturación d’unos servicios sociales que nun cunten colos recursos nin col personal necesario para faer frente a la situación
Llucía F. Marqués
This work is licensed under a Creative Commons Attribution 4.0 International License.
