Munchos de los establecimientos qu’esiben los cartelos del grupu neonazi Acción Social Asturies nun son coscientes del calter fascista y españolista del mesmu

Acción Social Asturias protagonizó yá delles acciones n’Asturies  a lo llargo los caberos meses, destacando la manifestación de quince persones con botes de fumu contra la Cruz Roja, por emprestar la so ayuda a persones migrantes, y la campaña de recoyía d’alimentos “solo pa españoles blancos” de los últimos meses, movilizaciones ambes que dexen bien claro’l calter racista y xenófobu d’esti grupúsculu.

La so cabera campaña céntrase nel consumu de productos propios, sol llema “Compra aquí, saldrás ganando”. La mayoría de los comercios que tienen el cartelu nel so escaparate son favoratibles a la ideoloxía retrógrada del grupu neonazi, lo que pa muncha xente ye argumentu abondu para evitar consumir nellos, pero tamién se tán rexistrando casos d’establecimientos qu’aceutaron poner el cartelu, convencíos polo evidente del mensaxe y desconociendo l’orixe del mesmu. Ye importante faer llegar esta información a estos postreros, cuidao que el boicó contra Acción Social podría tar perxudicándolos nes sos vientes.