“Queremos recoyer lo positivo d’esti 20120 pal asturianu y treslladar que la llingua asturiana va ganando presencia nes instituciones y normalidá na sociedá”
Iniciativa pol Asturianu presentó güei la campaña ‘Meyor noticia pal asturianu en 2020’ cola que la organización pretende escoyer, pente medies de la tradicional votación popular, la meyor noticia pa la llingua asturiana nel pasáu añu 2020.
Dende la organización apuntaron que “esta iniciativa estrenóse nel añu 2013 y ca añu que pasa va medrando’l númberu de participantes y la cantidá de noticies positives pal idioma. Tamién val pa facer un repás a tola llabor d’Iniciativa pol Asturianu y pa comprobar como añu a añu la llingua asturiana tien una repercusión positiva nos medios. Esti añu vimos como l’asturianu tien una partida presupuestaria nos PXE, l’usu l’ asturianu nes campañes del andanciu, los avances na toponimia, los nuevos planes de normalización…”.
Pa Iniciativa pol Asturianu esta votación ye importante porque “con esta campaña pretendemos facer llegar a los asturianos y a les asturianes delles bones noticies pal nuesu idioma. Amás, dende Iniciativa pol Asturianu queremos recoyer lo positivo d’esti 2020 pal asturianu y treslladar que la llingua asturiana va ganando presencia nes instituciones y normalidá na sociedá”.
Los y les participantes pueden escoyer ente un total de 25 bones noticies pal asturianu de diferente tipu, fasta 10 al mesmu tiempu. La votación entamó esti llunes 11 de xineru y va acabar el miércoles 20 d’esti mes. Como novedá esti añu van facer un sortéu de llibros ente tolos y toles participantes.
Redaición InfoAsturies
This work is licensed under a Creative Commons Attribution 4.0 International License.
