El seutor de la hostelería considera que les nueves restriciones aplicaes pol Gobiernu del Principáu al so seutor vuelven ser frutu de la improvisación. Ello ye que nun paez haber planificación dalguna nel sistema d’esperar a la fin de les disposiciones tomaes n’avientu p’axuntase y valorar les que se van imponer en xineru, nin en pidir propuestes a los hosteleros a posteriori de tomar decisiones
Adrián Barbón esperó al mesmu día nel qu’anunciaba les nueves restriciones para pidir al coleutivu d’hosteleros les sos propuestes, ensin tiempu para ser escuchaes nin aldericaes, daqué que dende’l seutor considérase una pantomima cola que’l presidente trata de dar una imaxe abierta y cercana, pero ensin nenguna intención d’escuchar realmente a los afectaos nin valorar les sos propuestes.
Dende la Plataforma Hostelería con Conciencia, énte la posibilidá de que llegaren llimitaciones d’esti tipu tres les fiestes navidiegues, desenvolvieren un plan de continxencia que contemplaba dos escenarios: un hipotéticu preslle o restricciones d’apertura, valorando les midíes económiques y sociosanitaries que podríen tomase p’aselar l’impautu sobro’l seutor en dambos supuestos.
Sicasí, nun fueron consultaos a tiempu y les nueves restriciones, según el colectivu, inoren les necesidaes de tol seutor hosteleru, tantu propietarios como trabayadores. Ellos, al contrariu de OTEA que defendieron l’apertura total de toes toes, defenden la importancia d’amenorgar el contautu social y la movilidá, siempres qu’eses midíes s’apliquen al conxuntu de la población “pero tamos fartos y cansaos de qu’estes llimitaciones se faigan a cuenta de un seutor estráu de pequeños autónomos y microempreses, mientres coles mesmes prodúcense aglomeraciones en centros comerciales, medios de tresporte públicos y privaos, centros de trabayu, grandes corporaciones o incontables fiestes privaes”.
Lo qu’indiquen los datos ye que los aconceyamientos sociales son el mayor focu d’andada, pero según apunten, eses xuntes caltuviéronse n’otros escenarios ya inclusive s’amontaron mientres el zarru de la hostelería. Según declaraciones de Felix Marcos en nome de la plataforma Hostelería con conciencia “El presidente guarda silenciu y prefier buscar culpables na hostelería, facilitando la desapaición y destrucción del pequenu comerciu pa beneficiu de les grandes empreses… Y síguen autodenominadose socialistes y obreros”.
Pal casu que nos ocupa, esto ye, l’amenorgamientu d’horariu hasta les ocho la tardi, les sos revindicaciones no económico inclúin una contraprestación económica mensual equitativa qu’ayude a los locales más vulnerables, variable en función de la renta y los gastos fixos del local y un plan asturianu de conciliación p’autónomos en casu de tener familiares direutos en cuarentena o por incapacidaes derivaes de la pandemia -al quedar los autónomos escluyíos del plan estatal “Mecuida”. Tocantes a les midíes sociosanitaries, la principal reclamación que fai’l colectivu ye la voluntariedá de zarru acoyéndose a les ayudes yá que pa munchos establecimientos esti escenariu de restricciones fai invidable una apertura.
El plan de continxencia d’Hostelería con Conciencia reivindica tamién la creación d’un sistema de desescalada que dexe afaese a los distintos tipos de negociu teniendo en cuenta los datos sanitarios y teniendo como referencia’l Plan d’Actuaciones de respuesta coordinada pal control de la tresmisión de COVID-19, presentáu pol comité interterritorial del Sistema Nacional de Salú.
Finalmente, recuerden que nos locales hosteleros xixílase exhaustivamente el cumplimientu de les midíes sanitaries (distanciamientu, usu del mázcaru, horarios, etc.) entantu que nos aconceyamientos en cases que tienen llugar mientres el zarru de la hostelería son de mal control per parte de l’autoridá pertinente. Asumen, eso si, la necesidá d’aplicar con contundencia les sanciones correspondientes a los locales qu’incumplen sistemáticamente la normativa.
Llucía F. Marqués
This work is licensed under a Creative Commons Attribution 4.0 International License.
