Ya, ya sé que diba muncho que nun actualizaba la crónica covidiana… pero lo del fríu nes clases pa ventilar al bichu bien merez un repasu na intrahestoria del coronavirus

Ocho de la mañana, 4 graos en Xixón, paez que güei nun va facer tantu frío como ayeri. Preparo la ropa pal mio fíu menor: camiseta térmica, camiseta, polar, dos pares de calcetos, pantalones, abrigu, bufanda, gorru y, comu añadíu reciente, unos pantalones térmicos tres talles grandes a los qu’acabo  meter una goma pa que-y valgan, que nun da’l presupuestu pa tantu fatu. “Nun se te ocurra posar na en clas” aporfio, la mayor ya ta mala del gargüelu por quedar en clas namás col polar y la térmica “Col abrigu y los guantes nun soi quien a escribir rápido”.

Los güeyos del rapacín déxenme claro que nun cuenta posar na. De fechu pídeme llevar una mantina a clas, revuelvo per casa y saco dos de cuando neños de rollu, pa qu’escueya. Polo menos güei nun llueve, que sinón entra l’agua. La situación da pie p’alderique familiar.

• Poneivos cerca la calefación.
• A nos quítenmosla a les once. Quédenme les manes azules. (Istitutu Nb. 1, Xixón)
• Nosotros nun tenemos calefación, ta estrozá va díes. Pa enriba tócame llaboratoriu, nel terceru y con ventanales grandes, tira l’aire pa esfrecer. (Fernandez Vallín, Xixón)

Entérome, esmolecía, de que lo de la manta ye más avezao de lo que camentaba y eso que tamos en Xixón, nun quiero pensar onde fae fríu de verdá. Dalgunos lleven la toquilla de les güeles, que da calorín pero dexa escribir bien; otros, cuéntame’l piqueñu, lleven el piyama debaxo’l pantalón. Tamién equí la fienda económica déxase notar, entantu unos lleven ropa interior térmico y abrigos de la ñeve otros amontonen xerses de llana con sudaderes y mantes. Una collacia, profesora, cuéntame que’l termómetru marcaba 5 graos en clas, pero cuando fue a contalo a direición iguáronlo darréu: quitaron-yos el termómetru.

Ya saliendo pa escuela decátome de que’l rapacín lleva non una, sinón les dos mantes. “Ye pa Ruslan” (nome ficticiu, pa nun mencionar al guah.e) que nun tien ropa d’abrigu. “Doila en parque, que nun mos vean, ya sabes que ta prohibio compartir”.

Contrabandu de calor.

Pa remembrar comu entamaba tou esto, nun vos perdais les Hestories del Coronavirus I, II, III, IV, V, VI, VII, VIII, IX, X, XI, XII, XIII,  XIV , XV  , XVI ,  XVII  , XVIII,

y XIX.

This work is licensed under a Creative Commons Attribution 4.0 International License.