Siguiendo’l camín de les vacunaciones a políticos, familiares y allegaos, los direutivos sanitarios y lliberaos sindicales amuesen el so compromisu y solidaridá pa cola salú pública y los trabayaores sanitarios colándose, ensin poder xustificar riesgu real nos sos trabayos de despachu, y aceutando un tratu de favor con respeutu a otros mélicos fuera de serviciu

Asturies tien inmunizaes a 9.003 persones, col 97% de les vacunes asignaes fasta agora ya utilizaes; ello ye, que a esti ritmu y suponiendo que se sigan recibiendo vacunes, a una persona sana del últimu grupu de riesgu que nun tea contautu direutu con xente enfermo o d’edá avanzao, tendría de toca-y vacunase comu pocu nel añu 2.030. Sicasí  direutivos sanitarios y lliberaos sindicales aceuten la so inclusión nel primer grupu, per delantre de los vieyos que nun viven en residencies y otros profesionales comu personal de caltenimientu d’hospitales, mayestros o caxeros, con más riesgu de contaxu.

A los direutivos sanitarios, que desendolquen el so llabor en despachos bien allonxaos de posibles puntos de contaxu, incluyóseyos colos sanitaros porque, según Concepción Saavedra, xerente del Serviciu de Salú del Principado y una de les beneficiaries d’esta decisión, «Estos equipos direutivos tuvieren un papel clave y tuvieron coldu con coldu nel territoriu col restu de profesionales. Nun tuvieron metios nos sos despachos sinon nel díi ente díi de la pandemia», declaraciones que llevantaron les protestes de los vraeros sanitarios de primer llinía, qu’aseguren que nun vieron un direutivu pelos pasiellos del hospital . «Nun se pue tener más focicu. Estos castronos lo más cerca que tuvieron d’un paciente con covid foi cuando los ven pela TV», aporfia Miguel Ánxelu Rodicio, enfermeru en primer llinía de la planta Covid nel HUCA, que careció en primer persona les consecuencies del contautu direutu con pacientes.

Per otru lláu, l’argumentu de que s’incluya a los lliberaos sindicales na primer fase de la vacunación, porque la evolución epidemiolóxica pudiere requerir de l’activación de profesionales con lliberación sindical, nun esclaria porqué siguiendo’l mesmu razonamientu nun se vacuna a tolos mélicos, colexaos y non colexaos, entamando polos que tan na llista d’espera del propiu SESPA naguando entrar a trabayar y a los que non solo nun se yos ufrió vacunación sinón que naide se punxo en contautu con ellos pa verificar la so disponibilidá en casu de ser necesarios.

This work is licensed under a Creative Commons Attribution 4.0 International License.