El Gobiernu d’Asturies vence énte les presiones d’Arcelor, comu vien espublizao nel Bopa, y concéde-y siguir contaminando cola puesta en furrulamientu de los 2 sinter al empar, pesi a nun tener operativos los nuevos filtros de mangues

Vien d’espulizase’l Resolvimientu de 23 d’avientu de 2020, de la Conseyería d’Alministración Autonómica, Mediu Ambiente y Cambéu Climáticu, pola que se revisa l’autorización ambiental integrá otorgá a les factoríes d’Avilés y Xixón” d’Arcelormittal España, S. A., en relación coles condiciones impuestes al Sínter.

Atiéndese tolos allegamientos presentaos pola empresa, pero dengún de los presentaos polos vecinos y la Coordinadora Ecoloxista, que desixien que dambos sinter nunca funcionaren al empar, fasta reformar el so sistema de depuración, lo que nun se fixo en dengún de los 2.

Esti cambéu produzse pesi a los continuos incumplimientos per parte la empresa de los plazos que tenía p’acabar les obres nel sinter A, que tendríen de tar en furrulamientu anantes de 31 avientu de 2019, va más d’un añu, ensin que se finaren entá.

Esiste incumplimientu de los valores llende d’emisión establecíos pal citáu focu F2, que s’atopen a valir a partir del 1 de xineru de 2020, por degolar el valor mediu diariu.

La empresa yera dafechu conoceora de la so obligación de dotar de sistemes de depuración adicionales a los esistentes lo mesmo que de la so obligación de cumplir les llendes de los parámetros afitaos  na Autorización Ambiental Integrá, lo que nun fixo cola complicidá del Principado, que-y dexó siguir emitiendo inclusive nel añu de la pandemia, tal como demuestra l’aumentu de les emisiones de les partícules Pm10.

D’alcuerdu a les conclusiones de los distintos estudios realizaos tanto pol Principado como pola empresa, les emisiones de los sinter son los que mas afeuten a la calidá del aire de los vecinos de la redolada poles emisiones de partícules Pm10, partícules que’l pasáu añu medraron de forma significativa, y superaron 90 díes los estragales de proteición a la salú nel conceyu de Xixón y en Carreño.

Dende la Coordinadora Ecoloxista estudien presentar un recursu de reposición contra dicha resolvimientu.

Redaición InfoAsturies

This work is licensed under a Creative Commons Attribution 4.0 International License.