El mes de febreru del añu 2018 dióse a conocer el proyeutu de lo que se prometía como una esperanzadora intervención n’ún de los nuesos xacimientos arqueolóxicos más singulares, el castru de Chao Samartín en Grandas de Salime, pero que’n realidá consistía nuna fonda alteración del conxuntu, tantu de los restos escavaos como de superficies inda inédites pero con enorme potencial arqueolóxicu.
Los defeutos téunicos ya irregularidaes a les que s’apunta dende l’informe del ICOMOS ya foron denunciaos naquel intre por arqueólogos y defensores del padremoñu asturianu: el proyeutu nun s’atién a les convenciones internacionales, ignora los valores que faen d’estes ruines un documentu esceicional pa la conocencia de la hestoria d’Asturies, falten informes ellaboraos por espertos en téuniques de restauración y caltenimientu arqueolóxicu, falten consultes ya investigaores especializaos responsables de la escavación ya interpretación histórica del xacimientu, preténdese l’usu de materiales y procedimientos irreversibles, incluyíu l’usu del formigón armáu, resines epoxídiques o la reconstrucción indiscriminada de murios, contraviniendo tolos encamientos y convenios internacionales qu’emponen les intervenciones en llugares arqueolóxicos.
Un aspeutu especialmente esmoleceor ye que, cola execución de les obres plantegaes, destruyiríense les principales evidencies de la ocupación prehistórica del asentamientu: les ruines del primitivu asentamientu fortificáu de finales de la Edá del Bronce, escontra’l 800 a.C. (el más antiguu conocíu n’Asturies), que sedríen, comu recueye lliteralmente’l proyeutu, soterraes porque “el so interés nun ye bien eleváu”.
La mesma suerte ta reservada pa los elementos defensivos que prueben la intensa y socesiva fortificación del castru mientres la Edá del Fierro (fosos y fases antigües de les muralles).
En resume, la execución de les intervenciones conteníes nos proyeutos d’obres urxentes y d’afitamientu de les ruines del Chao Samartín implica l’ocultamientu, desaniciu o falsificación d’elementos claves na interpretación del xacimientu, de la so hestoria y, poro, tamién de la Hestoria d’Asturies.
Afortunadamente, frente a la desidia del Principado, l’informe que’l Conseyu Internacional de Monumentos y Sitios
-organismu asociáu a la UNESCO- vien de remitir al Gobierno del Principado y al Conceyu de Grandas, informade la esistencia de series «irregularidaes» que «pueden incurrir en posibles illícitos en tanto a la normativa patrimonial. El mesmu organismu recordó al Principado la so oligación de velar pola proteición d’esti ellementu hestóricu, consideráu Bien d’Interés Cultural, señalando que nun ye preciso incorporar igües al proyeutu actual, sinón facer un nuevu.
