Quitar un mélicu d’onde fae falta pa ponelu onde fae falta un mélicu, la política de dudosa eficiencia de la sanidá asturiana que dexa desatendíes les urxencies del HUCA
Nel Hospital de Xarrio lleven meses reclamando un nuevu internista col que ampliar la so plantiya y poder atender con un mínimu de d’eficiencia a la población dependiente d’esti cientru mélicu. Finalmente la selmana pasá recibieron l’anuncia de que se cubriría la plaza solicitada… sicasí, los usuarios de Xarrió preferiríen que fuere d’otra manera, ya que’l mélicu internista destináu al so hospital provién direutamente del HUCA, onde trabaya nes guardies Covid.
Nun hai que dicir qu’estes guardies tan sorecargaes y que l’anterior dotación de tres mélicos pa ella yera ya escaso, polo que los sanitarios solicitaren que se incrementaren a cuatro los internistes disponiles pa les guardies. Sicasí, recien recibieron la noticia de la movilización d’un d’ellos al Hospital del Norocidente asturianu. El treslladu -forciosu- d’esti mélicu dexa l’Hospital Cientral d’Asturies con namás dos mélicos d’interna de guardia pa facer frente a la pandemia.
Entantu, los mélicos apuntaos na bolsa de trabayu del SESPA siguen ensin ser contrataos o contautaos siquiera.
This work is licensed under a Creative Commons Attribution 4.0 International License.
