El Gobiernu y la Conseyería taben informaos del estáu de la carretera y de los peraltos riesgos d’unviar a los trabayaores nes condiciones climátiques d’aquel momentu a unes carreteres yá de por sí altamente peligroses
Andecha Ástur vien de presentar na Fiscalía Cimera de Asturies una denuncia contra’l presidente Adrián Barbón y los cuatro responsables superiores de la Conseyería de Mediu Rural y Cohesión Territorial: Conseyeru, Viceconseyeru, Direutora Xeneral d’Infracadarmes y Xefe de Serviciu d’Esplotación y Caltenimientu de Carreteres, pola muerte’l pasáu 1 de xineru, de dos trabayaores soterraos por un ábanu na carretera AS-253que va de Cabanaquinta al Puirtu Braña (conocíu cómo Puertu San Isidro), al altor de Rufrío.
Los presuntos delitos de los que se-yos acusa son homicidiu por imprudencia, delitu contra los drechos de el trabayadores y delitu contra l’Alministración Pública. La formación aliega que’l Gobiernu asturianu conocía perfechamente’l riesgu que corríen los trabayaores y tolos usuarios de l’ AS-253, al movese per esta carretera, que’l so riesgu yá fuera llargamente rexistráu ya informáu y que, poro, unviar a los operarios a desempeñar les sos funciones neses condiciones foi una imprudencia que-yos causó la muerte; amás, la peligrosidá de la zona ye tamién frutu de la falta d’intervención -o la intervención errónea- del Principáu a la d’istalar les correspondientes midíes de seguridá que torgaren l’acidente. Estos delitos, de demostrase, tán castigaos con penes importantes de prisión y de inabilitación pal exerciciu la función pública.
De fechu, son dos los estudios científicos que señalen tolos puntos de riesgu de la carretera y les midíes de seguridá que precisa caúnu d’ellos, pero nunca tomaron denguna midía pa iguar esta situación y evitar riesgos, a pesar de qu’añalmente transiten esi tramu hasta 15000 vehículos.
Por tollo, desixen a la Fiscalía l’apertura d’una investigación seria que, de comprebar los fechos denunciaos, castigue exemplarmente a los responsables d’estes muertes, ya indemnice como ye mester a les families de los dos finaos.
Llucía F. Marqués
This work is licensed under a Creative Commons Attribution 4.0 International License.
