Dempués d’un tercer trimestre qu’apuntaba a una cierta recuperación económica tres el confinamientu, el PIB asturianu vuelve cayer nel cuartu trimestre del 2020, entantu na práuctica totalidá del Estáu siguía ameyorando, con un xorrecimientu mediu del  0,4%. Asturies yá partía a entamos del 2020 d’una economía un 11% más probe que la española

La cayida del 0,5% de la economía asturiana implica un distanciamientu de cuasi un puntu enteru cola economía española, que rexistra datos son positivos, según espubliza l’Autoridá Independiente de Responsabilidá Fiscal (AIReF); toles comunidaes rexistraron meyores del PIB ente ochobre y avientu -d’hasta un 0,9% en dellos casos- sacantes Asturies, Euskadi, con una caida del 0,4% y del 0,3% pa Navarra.

L’espeyismu vraniegu del turismu, principal responsable de la meyora económica d’Asturies nel segundu cuatrimestre, nun tuvo más consecuencies al llargu plazu que multiplicar les andaes y acelerar la segunda y  tercer fola del covid-19, daqué que contribuyó ensin dulda a les pésimes resultancies colos que se remató l’añu.

Seya que non, nun paez correcho culpar puramente a les cuestiones sanitaries de les resultancies económiques del país, en primer llugar porque en territorios xeográficamente asemeyaos, como pue ser Cantabria o Galiza, l’enclín ye’l contrariu, y en segundu por que esta desemeyanza ente les resultancies asturianes y les estatales lleva repitiéndose les últimes décades. Dende l’entamu’l mileniu’l PIB asturianu apenes amontara un 5%,  siendo yá a entamos del añu pasáu’l territoriu más probe del Norte l’Estáu. Poro, anque les cifres puedan abultar similares, la cayida del 0,4% n’Euskadi, nun pue valorase colos mesmos parámetros que l’asturiana, una y bones ellos partíen con un nivel de riqueza un 31’8% percima de la estadística española, ente qu’Asturies espeyaa nel mesmu periodu un 11% perbaxo ‘l nivel estatal.

Esta desemeyanza de cifres deriva d’un procesu de desaniciu sistemáticu del texíu económicu asturianu, sofitáu na corrupión endémica del gobiernu de Asturies y que lleva décades forciando a la población más granible, ello ye, la más nueva y la meyor prepará, al abandonu del país, nun círculu viciosu descendente que va ser necesariu correxir si nun quier afitase l’enclín descendente.

Llucía F. Marqués

This work is licensed under a Creative Commons Attribution 4.0 International License.