Esti sábadu 6 de xineru, nos Xardinos del Náuticu -Xixón-, a les siete la tardi, los asturianos tán llamaos a reclamar la llibertá del raperu y defender el drechu a espresar llibremente les sos idegues, un de los munchos drechos democráticos que s’incumplen sistemáticamente nel estáu español
La xusticia española preslla files en defensa del so Rei -l’Eméritu, nesti casu- y, nuna demostración d’asolutu dispreciu pola llibertá d’espresión -que por desgracia nesti estáu nun puede dicise ensin precedentes- l’Audiencia Nacional Española da a Pablo Hasel un ultimátum pa ingresar pol so propiu pie nun centru penitenciariu, onde tendrá de cumplir una condena de nueve meses y un día de cárcele por recoyer nos sos cantares la yá demostrada corrución de la Monarquía española.
raperu yá anunció que nun se presentará, «Yo nun voi presentame voluntariamente porque, ante una sentencia tan inxusta, considérolo una humildación. Yá ye una cuestión de dignidá nun allegar pol mio propiu pie a prisión, asina que van tener que venir secuestrame ellí onde m’atope, que probablemente va ser en ca mió», anunció Hasel nuna videoconferencia entamada pola eurodiputada de JxCAT Clara Ponsatí.
Hasel refugó tamién dise d’España pa nun dir a la cárcele, como fixo Josep Miquel Arenas, alies Valtonyc, fuxendo a Bélxica, onde espera que la xusticia resuelva la euroorden dictá contra él.
Los convocantes aportunen en qu’esta encarcelación vuelve poner sobre la mesa’l doble raseru de la xusticia española, que permite con indulxencia cualquier inxuria, insultu o inclusive menacia siempres que venga pola derecha, mientres ye capaz de saltase incluso la llegalidá internacional pa castigar exemplarizantemente a cualesquier que ponga en tela de xuiciu el status quo, menaciando la so sacrosanta unidá d’España o destacando los munchos privilexos de les clases más corruptes.
Asociaciones de Xuristes, redes d’abogacía y organizaciones de drechos humanos sollerten de tolo que supon esta sentencia, como precedente llegal d’encarcelación por opinión, precisamente nun intre nel que se tán plantegando toa una riestra de reformes lexislatives qu’afaigan les retrógrades lleis españoles a los estándares internacionales de drechos humanos sobre llibertá d’espresión, ente les que s’atopen la despenalización de los delitos d’inxuries, la restricción de los delitos de llevantos a la so comisión con publicidá, la despenalización de los delitos contra los sentimientos relixosos, llindar los delitos d’odiu al enguizamientu públicu a cometer delitos contra grupos vulnerables y faer lo mesmo colos delitos d’enaltecimientu del terrorismu. Nesti sen, los votos particulares de l’Audiencia Nacional y del Tribunal Supremu antemanen una “probable conderga” a España per parte del TEDH (Tribunal Européu de Drechos Humanos) o Tribunal d’Estrasburgo, si la condena al raperu nun fuere anulada anantes pol Tribunal Constitucional.
Llucía F. Marqués
This work is licensed under a Creative Commons Attribution 4.0 International License.
