Dempués del so preslle nel 2014, nel 2018 Balearia alcordó la so reapertura pa esti mesmu añu, supeditá a la istalación d’un depósitu de gas natural n’El Musel que permitiere l’abastecimientu del barcu

El zarru nel añu 2014 de la conexón ente los puertos d’El Musel-Xixón y Nantes-Saint Nazaire foi llaceriosa pa la salía de mercancíes estratéxiques camín d’Europa, pero amás, cola so desapaición presllaba la posibilidá de convertir Xixón nun importante cientru lloxísticu pol que pasaben los tresportistes vinientes de Portugal y España. La so recuperación yera urxente pa reactivar la unión con una zona xeográfica venceyada non solo  comercial, sinón histórica y culturalmente, al nuesu país.

D’ende la importancia del alcuerdu algamáu nel añu 2.018, cuando’l “Principado”, el Conceyu de Xixón y Puertos del Estáu apautaron sofitar esti proyectu y asina consiguir les ayudes de la XE y la participación de la empresa marítima Balearia. L’alcuerdu incluyía’l pautu de que l’Estáu y el “Principado” diben apurrir el 40% de los costos ca un, entantu que’l Conceyu Xixón diba asumir el 20% restante.

En concretu, los Presupuestos xenerales del Estáu acutaron naquel momentu una partía en reserva de 1,6 millones d’euros pa invertir n’Autopista la Mar mientres el “Principado” comprometía  una aportación de 300.000 euros nos dos primeros años, pa un proyeutu que reaniciaría el so camín, previsiblemente, nel añu 2021. Pela so parte, Balearia amosábase partidaria de siguir cola ruta enantes activa pente Nantes y Xixón, considerando que treslladála xeneraría gastos estra y una cayía nel enfotu los usuarios, polo que toles partes taben d’alcuerdu. La readaptación del barcu “Sicilia”, una embarcación de 186 metros d’eslora y una velocidá másima de 23 nuedos, con una capacidá de tresporte de 950 pasaxeros, 75 coches y unos 120 camiones, corría al cargu de les aides de la UE, siendo remotorizáu pa que pudiere salear usando gas natural como combustible, más llimpiu, acorde coles polítiques d’amenorgamientu de la contaminación marítima dictaes pola Xunión Europea. Pa ello, el “Principado” aceutó la condición de tener disponible esti combustible nel puertu d’El Musel, daqué que finalmente non se cumplirá -la planta regasificadora foi treslladada a Valencia- polo que l’alcuerdu ruémpese, perdiendo Asturies una oportunidá y una inversión irrepetibles.

Llucía F. Marqués

This work is licensed under a Creative Commons Attribution 4.0 International License.