Na tarde d’ayeri un camión de grandes dimensiones presentóse nos almacenes de la empresa d’amortiguadores Vauste, antes Tenecco, col enfotu de llevase los materiales de fabricación y maquinaria almacenaos na empresa, estenando cualisquier dulda que pudiere quedar sobre les intenciones d’esmantelamientu que’l grupu NMR -el mesmu implicáu nos despidos de EBHI y na trama carbonífera asociada- tien pa Vauste.
Dellos trabayaores, ente los que nun s’atopaba dengún representante de los sindicatos CCOO, UXT y USU, cortaron el pasu del camión hasta la llegada de la policía, a la que llamaron pa dar fe de los fechos. Sicasí, una vegada interpuesta la denuncia, nun pudieron torgar el vaciáu de los almacenes, de los que se sacó materia primo por valor de más d’un millón d’euros. El destín de too esti material nun ye otru qu’un esguace. Contra les declaraciones feches pola empresa les imáxenes dexen ver que nun se trata esclusivamente de maquinaria antiguo, sinón qu’hai materiales utilizables na actividá normal de la fábrica.
Recordamos qu’un grupu de trabayadores permanecen na caseta-protesta istalada al par de la factoría como midía de revindicación contra los 60 despidos aceutaos polos sindicatos CCOO, UXT y USU, pero que nun son asumíos pola mayoría del personal nin pol sindicatu CSI. Esti postreru lleva años denunciando l’esmantelamientu paulatín de la empresa, qu’anguañu se confirma, y a él pertenecen -ye difícil creer que de forma casual- la mayoría de los despidíos.