La Coordinadora Ecoloxista d’Asturies denunció énte la Confederación Hidrográfica del Cantábricu, Conceyu de Villaviciosa y énte la Conseyeria de Mediu Rural y Cohesión Territorial la persistencia d’arramaos de purinos a la Ría de Villaviciosa al traviés del ríu Rozaes
Los arramaos de purinos esponen a los colindantes a los sos efeutos gafos, que van dende los fedores ya irritaciones producíes pola urea fasta la esposición a les nitrosamines (potencialmente canceríxenes) pasando pola esposición a axentes patóxenos como Salmonella, Brucella, Mycobacteriumtuberculosos, Leptospira, Yeersinia, Campylobacter, Erysipelothris, Listeria y Treponema pente otros.
La Ría de Villaviciosa ta clasificá como Reserva Natural, Llugar d’Interés Comuñal (LIC), Zona Protección de les Aves (Zepa), y atópase na Llista de Güelgues d’Importancia Internacional polos sos destacaos valor ambientales RAMSAR (Convención Internacional relativa a les Güelgues d’Importancia Internacional); pero entá asina lleva 10 años presllada al marisquéu pola so elevada contaminación microbiolóxica (Escherichia coli, Enterococos intestinales), por mor de los arramaos que se producen nella na so zona alta de magar payares de 2011.
Los problemes de calidá de les agües polos constantes arramaos tán afeutando non solo al arruelu, sinón a los llabores de los pescadores/mariscadores profesionales que ven menaciada la so actividá pola posible tosicidá por bacteries presente nes agües que imposibiliten la comercialización d’estos productos.
Hai que recordar que yá la Directiva del Conseyu 91/676/CEE, de 12 d’avientu de 1991, relativa a la proteición de les agües contra la contaminación producía por nitratos utilizaos na agricultura, establez la obligación de los Estaos miembros d’identificar les agües que se topen afeutaes por nitratos d’esa procedencia, designando, nel so casu, como zones vulnerables a aquelles superficies que la so escorrentía de llugar a dicha afeición. Pesia ello y a la evidencia de paraxes con eses carauterístiques, n’Asturies la Conseyería de Fomentu nun designó nenguna zona vulnerable.
Redaición InfoAsturies
This work is licensed under a Creative Commons Attribution 4.0 International License.
