Amás d’a la enseñanza del asturianu, la falta de plantiya va afeutar especialmente a l’atención a les NEE y a la educación infantil, apiorando tamién les condiciones llaborales de los docentes
Na cabera mesa de negociación de plantiyes orgániques ente la Conseyería Educación y les organizaciones sindicales presentóse la propuesta de plantiya pal próximu cursu, que según el Sindicatu d’Enseñantes Asturianos SUATEA, ye insuficiente y nun cubre les necesidaes de la educación pública asturiana.
Na propuesta presentada nun s’inclúin puestos de profesores de Llingua Asturiana, en denguna de les sos variantes, nin se fai  dala previsión o estudiu pa cursos vinientes, pesia de los años de revindicación de puestos pa estes especialidaes. Ello va causar, un añu más, falta de profesores, retrasos n’incorporaciones y sobremanera, una peralta tasa d’interinidá (anguañu’l personal interín constitúi’l 30% de la plantiya) cola precariedá llaboral inherente.

La cifra total de puestos docentes caltiense práuticamente igual que n’años anteriores – en redol a 9.800 –, una cifra insuficiente que nun dexa dar respuesta a les necesidaes reales del sistema educativu con personal estable y que supón la contratación d’alredor de 4.000 interinos, de los que munchos van tar ocupando places que tendríen de formar parte de la plantiya fixa dende va años, lo que dende SUATEA califiquen de “abusu de temporalidá cometíu poles Alministraciones Públiques”.
La d’asturianu nun ye la única especialidá que se resiente; los departamentos d’orientación tampoco van recibir el refuerciu que precisen y la plantiya d’educación infantil va escayer respeutu años anteriores, lo que va faer imposible baxar ratios y atender correchamente les necesidaes educatives de tolos alumnos.

Llucía F. Marqués

This work is licensed under a Creative Commons Attribution 4.0 International License.