El partíu nacionaliegu critica duramente a Duro Felguera, remembrando’l so compromisu col franquismu y la so hestórica falta d’ética empresarial, que la lleva a tener reclamaciones, arbritraxes y demandes en tolos continentes. “Duro Felguera ye una empresa cuyos xestores sólo s’esmolecieron n’esplotar los recursos d’Asturies, esplotar la so clas trabayaora y rentabilizar la empresa a favor de los sos direutivos y aicionistes, mentantu la descapitalizaben“.

N’abril de 2020, Duro Felguera presentó un ERTE y n’agostu d’esi mesmu añu solicitó 100 millones € comu aída pública del Fondu de Sofitu a la Solvencia d’Empreses Estratéxiques (FASEE), xestionáu pola Sociedá Estatal de Participaciones Industriales (SEPI); d’esos 100 millones, 30 consistiríen nuna aportación de capital de la SEPI y 70 comu préstamu participativu.

Agora, en marzu de 2021, el Gobiernu de Barbón, sofitáu por Podemos ya IU, determina entrar nel aicionariáu de Duro Felguera, poniendo en manes del Conseyu Alministración 6 millones € que pagamos toles asturianes y asturianos. Per otru lláu, la SEPI, controlá por un Gobiernu español PSOE-Podemos-IU, apreba dir otra vuelta al rescate de Duro Felguera, apurriendo a la empresa 120 millones €, siendo la primer vegá que se rescata una empresa cotizante’n Bolsa. Pero con esta entrá del Estáu nel Conseyu Alministración de Duro Felguera, el Gobiernu español sólo controlará’l 44’8% de la empresa, polo que de denguna manera se garantiza la continuidá llaboral nin el cambeu de xestión que la salve de la quiebra. Esti regalu millonariu ye sofitáu pol PSOE, que pon la esculpia del Covid19, seique la empresa lleva ya dende muncho anantes en procesu de ruina planificá, y esculpiáu por Podemos, que trata d’antroxar a Duro Felguera d’empresa verdi.

Al mesmu tiempu, nun añu la empresa retayó los puestos de trabayu na so cuarta parte, quedando la so plantía en 1.200 trabayaores. Andecha Astur teme que la nueva inyeición económica ensín algamar el control públicu de la empresa y calteniendo el mesmu Conseyu d’alministración y la mesma estratexa nun protexa estos emplegos, polo que desixe un marcu llegal que permita la espropiación rápida de la empresa, ensin drechu a indemnización dala. Y que, una vegá convertía n’empresa pública, se xestione con participación clara de la so plantía trabayaores y con respetu total haza los sos drechos en materia trabayu y seguranza llaboral. Otra cosa sedría, denuncien, parte d’un  procesu de redistribución privatizaora de los presupuestos públicos. Nesi sen, ye interesante ver que’l so Conseyu d’Alministración cuenta pente los sos 5 miembros con 4 destacaos militantes del PSOE, dos d’ellos esdiputaos d’esi partíu, y toos ellos ex altos cargos n’empreses y organismos venceyaos al Estáu, una clara amuesa de les famoses “puertes xiratories” nes que los cabezaleros políticos españoles garanticen el so nivel de vida asegurándose puestos al frente de grandes empreses, onde cobren los favores fechos demientres la so llabor gubernamental.

Redaición InfoAsturies