Cofiño miente nes sos declaraciones sobro la contaminación y apreba un plan que permite la contaminación d’Arcelor cuasi otros 4 años, dotándolu con 10 millones de los que más de 6 dirán parar a meyores n’empreses privaes
Cola aprebación del plan d’actuación al curtiu plazu p’amenorgar los niveles de partícules en suspensión na atmósfera de la zona oeste de Xixón, el Conseyu de Gobiernu decide invertir 10 millones d’euros en dos años pa un plan d’amenorgamientu de la contaminación Conteníu nel refechu plan, que s’enllarga por cientos de páxines, atopamos midíes que recayen directamente sobro los ciudadanos, como que se van estremar los controles de tráficu pa evitar circulación a más de 30 kilómetru per hora. Sicasí, el plan flesibilízase cuando se trata de pidir responsabilidaes a la gran empresa. Coles mesmes que pretende menguar la contaminación, retrasa al 31 d’avientu del 2024 el plazu pa la meyora ambiental na factoría d’Arcelor, principal responsable de la contaminación na zona. Dientro del mesmu plan dota cola metá del presupuestu, 5 millones d’euros, la partida pa pagar la implantación del sínter B secundariu d’Arcelor. Según estudios del Principáu de 2015, esti Sinter ye la instalación que más contribúi a la contaminación industrial de Xixón.
Otru millón va destinase a dotar de suministru d’agua a los muelles de primera y segunda llínea d’El Musel, cola fin d’amenorgar les partícules sólides en suspensión provenientes del almacenamientu de carbón importáu al cargu de la empresa NMR, otra de les grandes protexíes del “Principado” y una partida más va pagar la pantalla qu’estreme les sos instalaciones de les de EBHISA.
Per otru lláu, les afirmaciones del vicepresidente del Gobiernu y conseyeru de Mediu Ambiente, Juan Cofiño, al dicir que “Les midíes nunca degolaron les llendes llegales pero sí ye verdá que tán en niveles descomanadamente altes“, llevantaron angüeñes pente los vecinos afeutaos, que tienen costancia de les más de 90 superaciones de les llendes afitaes, solo na estación del Lloredal, que nun ye la única que, según los datos apurríos pol “Principado” na so propia páxina web, trespasó les llendes llegales n’abondes ocasiones.
Amás, la nueva instalación del Lloredal va centrase nel control de les partícules inferiores a 10 micres, refugando espresamente los allegamientos pa que s’aplicaren controles a la contaminación por bencenu proveniente de les bateríes de coque de la siderúrxica.
Llucía F. Marqués
This work is licensed under a Creative Commons Attribution 4.0 International License.
