Pente l’1 ya’l 4 d’abril cellebraráse una versión restrinxía de la Primer Sidre l’Añu na que los protocolos de seguridá sedrán cuasi tan protagonistes comu la sidre. Nella caltiense non solo’l concursu a la Meyor Primer Sidre L’Añu 2021, sinon tamién la Asturianada y Sidre -telemática-, el Sidracrucis -en grupos de 4-, la tastia Guiada -previa iscripción-, y el Concurso de Sidre Casero fecho en Maera, combinando convocatories presenciales, con otres on-line
A lo llargo’l díe de güei tendrá llugar el concursu que decidirá cual ye la meyor sidre recién corchao de la collecha, nun certame nel que participarán llagares vinientes de toa Asturies. La tastia d’escoyeta tendrá llugar coles másimes midies de seguridá na Sidrería La Montera Picona de Ramón. A la mesma podrá asistir un cupu llendáu de persones, por rigurosu orde d’iscripción, pero podrá siguise online na direición https://www.youtube.com/user/INFOLASIDRA; y tamién n’Instagram: @revistalasidra.
El concursu costa de dos fases estremaes. Na primera, los miembros del xuráu prebarán -a ciegues- tolos palos participantes, valorando les sos cualidaes organoléptiques y escoyendo les siete con meyor puntuación, teniendo siempres en cuenta que nun se trata cenciellamente de buscar la meyor sidre, sinon de que tea les meyores cualidaes comu sidre nuevo y poro meyor pronósticu d’evolución.
Na segunda etapa, la final, el tribunal volverá a tastiar les sidres finalistes, faciendo al final público’l so veredictu. La que seya considerada polos espertos comu la meyor sidre nuevo d’Asturies sedrá la oficial de la Primer Sidre’l Añu y podrá esfrutase a lo llargo la prósima selmana en dellos chigres de Xixón, pente los que tan confirmaos La Montera Picona de Ramón, Poniente, Nuevo Parque, Tírate al matu, Jaime, El Centenario y El Veleru, aunque ye mui posible que se sumen más sidreríes, pudiendo informase na páxina web de la revista LA SIDRA y nes sos redes sociales. Amás durante la semana posterior al concursu y la siguiente, podrán canxease tres corchos de la marca ganadora por una mazcarina sidrera.
Esti concursu, con siete años de trayeutoria, ye un de los más singulares d’Asturies, siendo l’únicu que se fae cola sidre ensin trasegar, lo que se conoz como “Sidre sobre la madre”, un productu cuya comercialización ta recuperándose de magar la creación d’esti certame, entamáu precisamente con esi envís pola Fundación Asturies XXI y la revista LA SIDRA.
Nuria Prendes
This work is licensed under a Creative Commons Attribution 4.0 International License.
