La presión ciudadana, lliderá pol coleutivu “Asturies nun tien rei” obligó a l’alcaldesa de Xixón a anunciar, n’Agostu de 2020, el cambeu del nome de l’Avenía Juan Carlos I; una decisión ensin dubia difícil pa una edil bien conocía comu fan  de los Borbones españoles, que incluso forma parte del patronatu de la Fundación Princesa.

Nel orixe d’esa movilización, ta’l convencimientu de qu’Asturies nun tien rei, nin lu quier. Asina se recoyía na propuesta fecha por Andecha Astur a la Casa Conceyu de Xixón, en xunetu de 2020, na que s’aporfiaba na necesidá de retirar darréu el nome l’Avenía Juan Carlos, alegando pente les sos razones que “esi rei español ye herederu direutu de Franco y que’l vieyu rei tien un curriculum vergoñosu no que cinca a tráficu d’influyencies, cobru comisiones, ocultación de padremuñu monetariu, evasión fiscal y otros presuntos delitos“.

L’anuncia, mediu añu depués, de l’asignación del nome de Jose Manuel Palacios a l’avenía enorgullez a los participantes na revindicación contra’l nome’l monarca español. En concreto, Andecha Astur felicita nun comunicáu a la ciudá de Xixón por lliberase de l’Avenía Juan Carlos I, pero al mesmu tiempu pide a la Casa Conceyu un esfuerciu más pa desespañolizar y desmonarquizar los nomes de les cais de Xixón,  afitando’l vezu de poner nomes populares o rellacionaos cola cultura, la hestoria y la identidá d’Asturies. “Un gobiernu municipal PSOE-IU-Podemos nun debería tener problema pa ello“, aportunen.

Nel so comunicáu destaquen la honradez de José Manuel Palacios, primer alcalde de Xixón na dómina “democrática”a quien se-y dedicará agora l’avenía “Palacios foi un alcalde del PSOE, pero polo menos foi honráu dafechu, non comu Areces; poro, abúltamos una llaceria sinificativa que la cai de Palacios entronque cola que’l PSOE dedicó a Tini Areces en Xixón” declaren, faciendo comparanza d’ambos alcaldes y resaltando la creación d’una zona de la ciudá dedicá a “alcaldes del PSOE”.

Nuria Prendes