L’argumentu pa presllar siete de los once ambulatorios qu’abríen de tardi anantes del COVID-19 nun ye sanitariu, sinón puramente económicu

L’atención presencial n’ambulatorios amenorgóse bultablemente mientres la crisis sanitaria, col enfotu de menguar los llugares d’alcuentru ente persones y evitar posibles andaes. Una de les midíes tomaes, con calter temporal, foi la reunificación de l’atención vespertina en namás cuatro ambulatorios de la ciudá, presllando’l restu.

Agora Salú propón caltener indefinidamente’l zarru d’estos ambulatorios, retayando drásticamente los puntos d’atención mélica peles tardis, una midía que difícilmente pue desplicas dende la intención d’ameyorar la calidá asistencial y/o encurtiar les llistes d’espera y que xeneró un fuerte refugu ente los vecinos, anque non tanto ente los sanitarios.

Éstos amuésense partidarios del amenorgamientu definitivu, siquier mientres non se dote a los servicios de personal y medios abondos. Ello ye, que ven preferible esaniciar puntos d’atención pero garantizar una atención eficiente n’aquellos  que permanezan abiertos. L’argumentu oficial ye precisamente esti, ello ye, que nun ye que l’apertura de los ambulatorios nun seya necesaria, ye que nun hai suficiente personal pa toos ellos y el so caltenimientu supíon un gastu “escesivu ya innecesariu”.

Pa la Federación d’Asociaciones de Vecinos de la Zona Urbana (FAV) la solución ye cenciella. Nesti momentu, más que nunca, ye imprescindible invertir en sanidá, asina que lo que procede ye contratar a más personal sanitariu, lo que dexaría caltener abiertos los once ambulatorios, emprestando un meyor serviciu y amenorgando la sobrecarga nos mesmos.

El problema nun se deriva de la situación xenerada pol COVID-19, yá que nel 2.019 intentárase yá esti retayu, atopándose cola fuerte oposición ciudadana. Sicasí, la necesidá de control de posibles andaes, xunto coles consecuencies de la desatención médica derivá de más d’un añu cola mayoría de los recursos sanitarios dedicaos a la pandemia, faen más necesario que nunca que s’invierta n’ameyorar la sanidá pública, non en retayala.

Llucía F. Marqués

This work is licensed under a Creative Commons Attribution 4.0 International License.