Dientro les aiciones planeaes pol coleutivu de profesores interinos pa reclamar los sos drechos, ayeri cellebraron una fuelga y concentración. En díes anteriores fexeren concentraciones delantre los cientros escolares y pitaes en coche peles cais de Xixón
Los convocantes valoren el siguimientu de la fuelga d’interinos nun 35%, siendo más significativu’l mesmu en centros de Secundaria y nos conceyos de Xixón, Uviéu, Avilés y les Cuenques. Estos datos, reconocen, son sesgaos yá que cuasi la metá de la plantiya interina tienen contratos a media xornada y dellos nun trabayaben ayeri, polo que queden escluyíos del cómputu.
La concentración, que tuvo llugar a les 12 de la mañana na Plaza España, n’Uviéu, onde tán les oficines de la Conseyería d’Educación, axuntó a unes 300 persones, cifra qu’ella sola supera la incidencia reconocía oficialmente pal siguimientu de la fuelga.
La protesta cientrase’n dos reclamaciones: l’aplazamientu de les oposiciones previstes pal branu de 2021, por cuenta de la inseguridá sanitaria xenerada pola pandemia y la negociación d’un nuevu Alcuerdu d’Interinidá que garantice una mayor estabilidá y qu’ameyore les condiciones del actual.
Recuerden tamién que’l profesoráu ye’l tercer coleutivu profesional con más seropositividad (11%) por COVID-19 tres el personal sanitario y sociu-sanitariu, lo que xunto cola medría del trabayu polos nuevos protocolos xenera una ansiedá escesivo nos docentes, que nel casu del profesoráu interín amóntase ante la celebración d’unos procesos seleutivos nos que se xueguen les sos espeutatives y los sos puestos de trabayu. “Hai que tener en cuenta que l’Alcuerdu d’interinidá obliga a presentase a les oposiciones y a realizar la primer prueba completa con llectura incluyida. Salvu en casu d’hospitalización por embarazu o partu, quien nun se presenten van aparrar de les llistes y van perder el so puestu de trabayu”. Recibir la segunda dosis de vacuna de Astrazéneca programada pa los díes anteriores al empiezu del procesu selectivu, nun esanicia esta obligación anque se carezan efeutos secundarios.
Redaición InfoAsturies
This work is licensed under a Creative Commons Attribution 4.0 International License.
