Nesta Selmana de les Lletres, Andecha Astur perafítase na so vindicación d’una Oficialidá de plenos drechos pal asturianu, y fai un llamamientu a la coherencia frente a los discursos “amables” que nun pretenden más que caltener la represión llingüística y les polítiques d’asimilación cultural, baxo una falsa apariencia de normalización democrática.

Nesta entrevista, Llucía Fernández Marqués, de la Xunta Executiva d’Andecha Astur, damos la so visión de cuala ye la situación llingüística d’anguañu

 La Oficialidá ¿más cerca que nunca?

Si, ensin dubia. Nun tienen más remediu. El pueblu asturianu lleva cerca de mediu sieglu desixéndola activamente y yá nun se va conformar con menos. Per otru llau, la situación de represión y negación de los drechos llingüísticos del pueblu asturianu pon al Estáu español y al Gobiernu d’Asturies nuna comprometida situación d’illegalidá, motivu pol que van recibiendo dellos apercibimientos por parte de la Xunión Europea.

La oficialización de la llingua asturiana ta cerca ¿Porqué sinon un partíu comu’l PSOE, que llideró hestóricamente  la represión y la oposición llingüística diba dar esti aparente cambiu de sen y dar a entender que son favoratibles a la oficialidá? Porque ven que ye un fechu inaparable, que va p’alantre y quien subise al carru… o meyor, quien que paeza que se suben al carru, pero de fechu, lo que faen ye torgalu.

Fales del PSOE comu enemigos de lo asturiano…
Ellos son los responsables de que nun tengamos Oficialidá ¿Nun roblaron ellos un Estatutu, impuestu dende Madrid, nel que nun se reconocía la nuesa llingua? ¿Nun protagonizaron ellos los episodios más vergoñantes de represión llingüística, reprimiendo l’asturianu, sofitando les polítiques de disgregación/asimilación llingüística y de galleguización del ocidente asturianu? Los mesmos idegales y argumentariu qu’anguañu son bandera de Vox, son los qu’esgrimía va unos años el PSOE.

Pero Adrián Barbón ye una esceición, ¿non? ¿nun se dixo favoratible al asturianu nel so programa elleutoral?
Hai que mirar un pocu p’atrás y ver quien ye Adrián Barbón. Anantes de Presidente del Gobiernu, Barbón foi Alcalde’n Llaviana demientres 9 años, y anantes otros tres foi conceyal. ¿Qué fizo elli nesos cargos? Nesos 12 años nel so conceyu nun se vio un solu avance, nin no social nin no político, que pudiera facer camentar que Barbón s’enfrentaba al aparatu socialista y se ponía del lláu de los asturfalantes.

Adrián nun ye más qu’un personaxe gris qu’obedez perbién los mandaos de Madrid y que sabe aprofitar perbien les ocasiones ensin dar un solu pasu alantre real.
Asina fizo nes caberes elleiciones, cuando engañó a miles d’asturianos cola falsa promesa de sacar alantre la Oficialidá, llegando a llendes tan vergoñoses comu que dende  l’ALLA, un organismo autónomu y teóricamente independiente, se pidiere’l votu pal PSOE amparándose nes sos promeses y mira, a un añu del fin del so mandatu sigue dando llargues y xugando con estratexes pelligroses que perxudiquen seriamente’l panorama llingüísticu.

Nun m’estrañaría que, dempués de perder toles oportunidaes que tuvo –y tien- na so man pa facer oficial l’asturianu, les dexe pasar con tal de tornar a utilizar esi ganchu nos prósimos comicios.

¿A qué te refieres con “estratexes pelligroses”?

En primer llugar ta la más qu’evidente cadena de promeses y retrasos que mos lleven, agora, a finales del 2021 pa “entamar a tratar el tema” desaprofitando una coyuntura única na que cuntamos con 27 parllamentarios favoratibles pa la Oficialidá, una oportunidá que podría nun repetise a curtiu plazu.

Per otru, la pelligrosísima falacia de la “Oficialidá Amable”. La oficialidá d’una llingua ye un conceutu xurídicu, que garantiza drechos plenos a los falantes d’una llingua y los iguala llegalmente a los falantes d’otres llingües dientro del mesmu estáu. Ello implica cuestiones comu que seya llingua vehicular nel enseñu, que l’alministración pública tenga por méritu y necesidá la conocencia l’asturianu, que l’aición de les alministraciones públiques xorreza y s’esprese na nuesa llingua, que se priorice y se favoreza la convivencia social n’asturianu… Sicasí, lo que pretenden con esta “amabilidá” ye conformar a los asturianos con una llegalidá endexe, que nun dea al asturianu nin l’estatus xurídicu que-y correspuende, nin drechos suficientemente reconocíos, nin futuru garantizáu, culminando con ello el procesu de desasturianización y asimilación cultural nel que lleven enfotaos munchos años.

Nun queremos una Oficialidá d’adornu, desiximos una Oficialidá de plenos drechos pa la nuesa llingua nacional, lo contrario ye rise de los asturianos y de pasu incumplir tolos trataos internacionales en materia llingüística. Una reforma del Estatutu d’Autonomía que mos impunxeron dende Madrid a los asturianos, que nun recueya una oficialidá de plenos drechos non solo nun sedría un avance, sinón supondríe un retrocesu bien difícil de superar, darréu que baxo l’apariencia d’una normalización democrática en drechos llingüísticos, supondríe la continuación de forma “amable” de la represión llingüística que carecemos n’Asturies, y l’afitamientu d’un modelu llingüísticu folclorizante, ensin futuru pa la nuesa llingua.

Pa finar, el tercer pilancu artificial que Barbón ta poniendo al asturianu ye dar voz a los facistes de VOX nos sos espatuxes (non en baldre tienen grupu parllamentariu gracies al PSOE). Al aceutar los postulaos del facismu español comu ciertos, entrando nel falsu alderique de la comprensión o non por parte de los diputaos de VOX de la llingua asturiana y guetando soluciones alministratives a lo que nun ye sinón una falta de respetu, lo que faen ye da-yos espaciu, aprofitando estos teóricos conflictos pa ralentizar tolo que pueden l’incontenible avance de la Oficialidá.

Falando d’ellos. ¿Qué camientes de la postura de VOX?

Paezme congruente. Son facistes y españolistes, que disprecien lo asturiano y disprecien los drechos del pueblu ye lo que yos correspuende, caltiénense dientro la so propia llinia. El so enconu contra tolo asturiano pon de manifiestu que quien s’opón a los drechos llingüísticos de los asturianos nun ye otra cosa qu’eso: un facista.

.

This work is licensed under a Creative Commons Attribution 4.0 International License.