Esta clase de creitos, que pon a dimposición de los consumidores dineru a devolver a plazos, llevaron a la insolvencia a miles d’asturianos que, como nel casu citáu, nun son quienes a saldar les sos deldes énte l’eleváu nivel d’intereses apautáu

El Xulgáu de primera Instancia Númberu 1 de Mieres declaró nulu un contratu de creitu revolving qu’un vecín de la llocalidá mierense alquirió en 2014 cola entidá Wizink “pol calter usurariu del interés remuneratoriu”.

Como despliquen dende la plataforma Recupera Revolving, encargá de la defensa, l’interés contractual asitiábase nun 27,4% TAE. Sicasí, los datos del Bancu d’España indiquen que “l’interés mediu nos creitos revolving yá ye de por sí bien eleváu, en redol al 20%, polo qu’el nuesu representáu non solo taba pagando de más, sinón que vía como la so delda pendiente nunca menguaba”.

Esta clase de creitos, que’l so interes ta en dexar a los consumidores disponer de dineru darréu y a devolver a plazos, llevaron a la insolvencia a miles d’asturianos que, como nel casu citáu, nun son quienes a saldar les sos deldes énte l’eleváu nivel d’intereses apautáu.

Dende la plataforma Recupera Revolving, que defende a los usuarios d’esta clase de creitos frente a los bancos y financieres emisores, animen a que los afeutaos reclamen. “Lo cierto ye que les reclamaciones aumentaron desque’l Tribunal Supremu dictara en marzu de 2020 que los creitos revolving con intereses notablemente perriba’l 20%, la gran mayoría, son usurarios y por tantu nulos. Con esti respaldu, los consumidores tán animándose a reclamar. El pronósticu ye inclusive meyor pa los próximos meses dempués de que’l Tribunal de Xusticia Européu amosara’l so sofitu a esta doctrina.”.

Redaición InfoAsturies

This work is licensed under a Creative Commons Attribution 4.0 International License.