Alejandro Calvo, Conseyeru de Desendolcu Rural, declara que’l pasu alternativu al argayu de Salas «podría tar en dos meses»
Entá nun hai fecha pal’entamu de los arreglos del desprendimientu nes obres de la futura autovía Curniana-Salas, que corta dende hai casi un mes la única vía que xune’l Suroccidente asturianu cola zona central.
Mientres se pon en marcha dalguna solución, los conceyos de Salas, Tinéu, Ayande, Cangas, Ibias y Degaña, van tener como única vía de comunicación con Uviéu’l Corredor del Narcea, una carretera estrozada que va tener que soportar más tráficu y caravanes que retrasen los desplazamientos n’hores.
Pel momentu pa llegar a Salas dende’l centru del país, los vehículos llixeros tienen de dirixise nel enllaz de Doriga, al traviés del AS-15 sentíu Cangas, para esviase darréu en Sotu de los Infantes escontra Salas pola AS-226. Mientres, los vehículos pesaos tendrán de circular pola AS-15 sentíu Cangas pa coyer l’AS-215 hasta El Cruceru y dende ellí l’AS-216 a La Espina.
Los esfuerzos, siquier verbales, céntrense enagora na construcción d’un pasu alternativu que dexe retomar les comunicaciones mientres se realicen les obres de estabilización, que nun se preve que tean remataes antes del caberu trimestre del 2022. Asina, Calvo declaró qu’esta solución temporal va ser vidable dientro de dos meses, como poco, lo qu’implica allargar l’aislamientu de la contorna siquier tres meses, incluyendo bona parte’l branu.
Amás, los precedentes tocantes a cumplimientu de plazos nun son falagueros. Les obres de l’autovía del surocidente (A-63), que xune la mayor parte de los conceyos d’esa parte de Asturies, taben planiaes pa tar completes va once años y con esti imprevistu entá nun se van rematar en siquier otros dos años. Poro, los alcaldes de Salas y Tinéu, Sergio Hidalgo y José Ramón Feito, nun confíen nel anunciu d’amenorgamientu de plazos pa desbloquiar la N-634, presllada dende va cuasi un mes al altor de Casazorrina y desixen “ver les máquines trabayando” una y bones les obres entá nun empezaron pa retirar los restos del desprendimientu de la carretera.
This work is licensed under a Creative Commons Attribution 4.0 International License.
