La Conseyería carga contra un profesor del IES Universidá Llaboral, investigáu por enfrentase a les desigualdaes del sistema educativu. Los sos escolinos abren una recoyía de robles en change.org p’apoyalu

Toos tuvimos profesores tarrecíos pol so enclín a suspender sistemáticamente a los sos escolinos. Asina comu profesores qu’abusaben del so poder, y profesores que, pesi ser, non yá inútiles, sinón tamién contraproducentes, siguen dando clas a xeneraciones y xeneraciones. ¿Qué vos paecería que, mientres estos docentes siguen “dando clas”, haiga otros docentes que sí cumplen cola so función, pero son sancionaos? Esti ye’l casu de Yván Pozuelo Andrés, profesor de llingua francesa nel IES Universidá Llaboral.

Yván Pozuelo ta enfrentándose a hasta trenta años d’inhabilitación profesional por una supuesta “neglixencia grave”, que se basa en calificar con un diez a tolos alumnos que lleguen a los mínimos establecíos. Esto lleva faciendo catorce años, y ye namás cuando publica’l llibru “Negreros o docentes, la revolución del diez” qu’a la conseyería d’educación entama a esmolece-y esta tema.

Nun s’atopó nengún escritu oficial que dictamine que’l cinco seya l’alquisición de les competencies mínimes, poro Yván Pozuelo opta por aidar a los sos alumnos a algamar estos mínimos, pa poder pone-yos la nota másima. D’esta forma evita l’escoyer pente alumnos inocentes, víctimes del sistema educativu heredáu del Franquismu.

Destacar que la ispeción, entamada pola conseyería ensin que medie una sola denuncia per parte de families, alumnáu, profesoráu y equipu direutivu en venti años de docencia, concéntrase non tantu nel esclarecimienu de la verdá comu en en buscar irregularidaes inesistentes.

Nun puede dicise que Yván Pozuelo nun esamine a los sos alumnos, cuidao qu’estos realicen pruebes grabaes en vídeu, que s’almacenen de forma virtual. La diferencia ye que’l tiempu pa preparalos ye’l de clas, pa evitar que los alumnos tengan que trabayar en casa. Nun podemos garantizar una igualdá de condiciones nes cases, pero podemos garantizala nes aules, y esta ye la forma de faelo. Coles mesmes, hai otru gran puntu que’l sistema educativu actual nun cubre, y ye la competitividá y la desigualdá nos exames al usu. Estos exames tradicionales son un camín a la competitividá académica y los problemes derivaos del estrés. Nun ye lo mesmo l’exame d’un alumnu con una familia encadarmada, que l’exame d’una alumna con problemes familiares, qu’aquél d’un alumnu neurodiverxente, qu’el d’una alumna con velea, ansiedá o depresión. Nun ye d’estrañar que’l suicidiu seya la tercer causa de muerte pente la mocedá d’ente 15 y 29 años. ¿Nun ye quiciabes neglixencia grave ignorar la situación y necesidaes específiques del alumnu?, non, a esto llamase “inclusión”.

El términu de Neglixencia grave” defínese como “violación flagrante d’un deber llegal con al respective de los drechos de los demás”, y, sicasí, la única violación de derechos qu’hai equí ye la de la llibertá de cátedra y d’espresión.

Alisa Anikina

This work is licensed under a Creative Commons Attribution 4.0 International License.