La cantera tien autorización p’afondar na actual zona d’esplotación dica l’añu 2046 pero non pa avanzar fora d’ella
Los vecinos de la zona de Perlora y la CEA denuncien que ta aprofitándose l’allugamientu de piezometros de la filtración d’agües de mar na actual cantera de Perecil pa realizar otru sondéu a la gueta de caliar na zona, a pesar de que nun hai proyeutu d’investigación y de qu’estos sondeos tán fora de la zona delimitao de la cantera; ello ye que los mesmos tan faciéndose nun camín públicu y peraveraos de los núcleos de Salguero, Dormon la Torre, la Ilesia y Espasa. Foron los mesmos operarios que tán realizando los sondeos los que confirmaron que tán buscando material.
Esta cantera tien autorización p’afondar l’actual zona d’esplotación hasta l’añu 2046, pero non p’avanzar fora de la zona d’esplotación nin pa cruciar la carretera AS-118. Dende l’entamu de la cantera, en 1956, esta tuvo socesives ampliaciones, con numberoses repercusiones ambientales, teniendo un notable impautu para los vecinos la Arquiella, Ponteo, Campanal, Yavio, Braña, Perecil, Pedrera y Prau a los que se sumaríen les llocalidaes de Salguero, Dormon la Torre, la Ilesia y Espasa, en casu de faese realidá esta ampliación.
Pa evitar qu’esto asoceda, dende la Coordinadora Ecoloxista d’Asturies reclamaron a la Conseyería Industria y al Conceyu de Carreño que paralice los sondeos.
Redaición InfoAsturies
This work is licensed under a Creative Commons Attribution 4.0 International License.
