Música nel muséu ye un espaciu d’alcuentru pa tol@s interesa@s na música tradicional, que nes décades caberes asentó nel panorama cultural asturianu y frutió propuestes anovadores y venceyaes colos problemes del tiempu de nueso. Nelli cellebraránse cinco conciertos ya una masterclass de pandereta, con places llendaes a diez persones pa la masterclass y 75 persones pa los conciertos, siendo imprescindible apuntase previamente. 

La masterclass, impartida pol pandereteru Ramsés Ilesies, cientraráse nos toques de la fastera cunqueira y cellebraráse al aire llibre de magar les 10:00 hores.

Al les doce’l mediudíe entamará’l primer conciertu, nel que’l duo “El Carreru & Blanco”, entamáu por Pablo Carrera  a la gaita y David Varela Blanco al acurdión y voz, fadrán un percorríu pela música baillable d’Asturies.

Ambás y Ramsés garrarán el testigu a la una, con un conciertu nel qu’estos dos investigadores enfotaos n’esparder la cultura asturiana, fadrán por asoleyar el valir que tevo na tradición asturiana la voz acompañada de percusión, allegando al escenariu instrumentos como la pandereta, el panderu cuadráu y el tambor. Tamién se-y presta atención a la realidá llingüística d’Asturies, amosando les sos variantes tal como foron recoyíes nos cantares que-y dan cuerpu al conciertu.

Depués d’una posa pa la xinta, los conciertos entamen otra vuelta a les cincu la tarde cola actuación de Xeitu, que presentará el so discu “15 años con Xeitu”, frutu del enfotu d’esti grupu, entamáu nel  2005 baxo la direición de Paulino Santirso y María Vázquez, por caltener y esparder el baille asturianu.

A les siete ta prevista l’actuación del grupu Algaire, formáu poles pandereteres Iratxe Espina, Carla Miranda y Loreto Suárez, y el guitarrista Juan Yagüe. Algaire ufre un repertoriu variáu de música tradicional del norte de la península, amás d’igües de temes con lletres reivindicatives.

Finará’l ciclu de magar les ocho la tardi Caldo y Os Rabizos, bandina procedente del Eo-Navia qu’abarca col so repertoriu popular los conceyos dende la montaña llucense dica la fastera los vaqueiros d’Alzada y dende la mar dica los montes d’Ibias.

Tola música que toquen provién de la so investigación de campu previa, siendo les sos fontes d’información los músicos tradicionales y toles persones con alcordances de cancios carauterísticos de la zona o de dalgún istrumentista que nun pasare por dala escuela de música.

Tolos conciertos son de baldre.