La Lliga Celta d’Asturies denuncia los efeutos de la erosión marina sobro’l Castru El Castiellu, en Samartín de Podes

La Lliga Celta y l’Asociación Cultural El Curbiru de Bañugues lleven dende’l 2016 demandando a la Conseyería de Cultura que se realice una actuación urxente nel xacimientu, cola implicación del arqueólogu Alfonso Fanjul. Inclusive llegaron a presentar un proyectu detalláu de la mesma, pero ésti foi refugáu ensin que se propunxera una solución alternativa. Mentanto, la mar sigue avanzando inesorablemente n’un de los castros costeros más pimpanos d’Asturies.

Les entidaes reclamen a la Conseyería de Cultura la inmediata toma de midíes destinaes al caltenimientu de los importantes restos arqueolóxicos que contien el xacimientu. Tolos sos proyeutos fueron refugaos «magar ser con un costu cero pa les arques autonómiques». Dende l’asociación «llamenten» lo que consideren una perda importante del padremoñu del conceyu  Gozón, que nel casu del castru de San Martín de Samartín de Podes, «nun puede xustificase énte la meyora del deterioru esistente nel xacimientu y al que l’Alministración nun pon medios».

El Castru El Castiellu, reconocíu’l 7 d’ochobre de 1960 por José Manuel González y Fernández y agregáu al so catálogu de castros de 1966, estudiáu por Jorge Camino Mayor en 1989 y reconocíu mientres la ellaboración de la Carta Arqueolóxica del conceyu de Gozón nel 1994, ta incluyíu nel Inventariu del Padremoñu Cultural d’Asturies (IPCA) del 23 d’avientu de 2013 y nel Catálogu Urbanísticu del conceyu de Gozón, tolo cual tendría d’asegura-y una protección de la que, de fechu,  nun gocia. La situación del castru agravóse bultablemente nos cinco años que pasaron dende la primer presentación d’esta aniciativa.

Redaición InfoAsturies