Los descansos estivales del personal mélicu y ausiliar súmense a les baxes por estrés derivaes de la dura situación vivida nel ámbetu sanitariu nel caberu añu y mediu, amenorgando la plantiya en más del trenta por cientu nun branu nel que les cifres de contaxos superen les d’anteriores foles

Una política de contratación deficiente na que escasamente se cubren -como los propios trabayadores sanitarios denunciaben ya en primavera- una de cada diez baxes, ta llevando a los cientros de salú y hospitales de toa Asturies a una situación crítica, na que falta ya un terciu del personal. Dende’l mes de mayu falten mélicos pa cubrir les guardies, dandose’l casu de que davezu queden vacies.

El plazu del xestor de la sanidá pública asturiana p’aprebar el calandariu de vacaciones finó’l 31 de marzu, colo que va cuatro meses que se conocen munches de les vacantes que diben quedar nestes feches. Tamién l’aumentu de baxes derivaes de les situaciones d’estres vivíes demientres los momentos más duros del andanciu yeren previsibles, seique non con tanta precisión. La dureza del trabayu mélicu medra cuando tienen que facese cargu del trabayu de tres consultes, lo que deriva en más esgotamientu y más baxes, nun círculu d’abegosa salida.

Amás, nos prósimos dos años ta prevista la xubilación de 200 mélicos más, ensin que seya fácil la so reposición, teniendo en cuenta la pésima calidá de los contratos que’l SESPA ufre. Un mélicu cobra n’Asturies un 20% menos que, por casu, nel País Vascu. Les condiciones llaborales en tol estáu tan mui perbaxo que les d’otros países na Xunión Europea; Francia, por exemplu, ufre salarios de 8.000 euros al mes con un másimu de 30 pacientes al día, polo que son pocos los mélicos que quieren quedar a trabayar nel país.

Pa completar el despropósitu, los númberos clausus torguen la titulación d’una mayor cantidá de mélicos na Universidá d’Uviéu y la escasa convocatoria de places MIR compliquen la disponibilidá de mélicos asturianos.

La situación resúmese en munches baxes, pocos mélicos contrataos, pocos mélicos contratables y condiciones de contratación pocu petecibles que dificilmente atrayerán personal mélicu. Tou ello cola unidá de Covid del HUCA ya col 80% de les sos places enllenes.

Nuria Prendes

This work is licensed under a Creative Commons Attribution 4.0 International License.