Los vecinos de Xixón ven afán recaldador na estricta aplicación de la llei, especialmente teniendo en cuenta que les velocidaes másimes nun tan correchamente indicaes na señalización de la mayoría de les cais afeutaes
A los 23 díes d’aplicación de la nueva Ordenanza de Movilidá ya se contabilizaben 680 multes por circular a velocidades superiores a 30 por hora, amás de 20 sanciones por dir en patinete llétricu ensin utilizar cascu. De magar entos la situación apiora, llegando a saturar el serviciu de Correos con más de mediu millar de notificaciones entregaes al díe.
La nueva ordenanza de Movilidá, en vigor de magar el pasáu 1 de xunu, impón un llímite de velocidá de 30 kilómetros por hora en toles víes urbanes con un únicu carril por sen de circulación. Sicasí, na mayoría d’elles nun hai dala señal que marque estes velocidaes. Lo que si hai son radares móviles a la caza’l conductor veloz, ello ye, de cualisquiera que vaiga a 37 o más km por hora; radares bautizaos comu “El Sacaperres” polos vecinos de Viesques, una de les fasteres más afeutaes pol entusiasmu multador con alrodiu de cien multes al díe.
La indignación ciudadana ye grande ante lo que consideren un trucu pa recaldar perres pal Conceyu Xixón, ya que consideren qu’estes midies, lloñe de ser una cuestión de seguridá viaria, son a cencielles un sistema pa engrosar les arques municipales. Ca sanción implica 100 euros, 50 si se paga nel plazu d’un mes dende la so emisión. Ello ye, namás en Viesques tan recaldándose un mínimu de 5000 € al día nesti conceutu.
Redaición InfoAsturies
This work is licensed under a Creative Commons Attribution 4.0 International License.
